RAEOA- Loron Domingu, 12 janeiru 2025
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos, hamutuk ho Autoridade Rejionál RAEOA, hala’o enkontru ho manorin sira hodi fahe rezultadu ne’ebé alkansa ona no dezafiu sira ne’ebé infrenta durante tinan 2024 no divulga planu asaun anuál no orsamentu Ministériu Edukasaun nian ba tinan 2025, iha Hotel Oe-Upun RAEOA.
Iha diskursu, Sua Exelénsia Ministra Edukasaun Dra. Dulce de Jesus Soares, hateten, ho onra no orgullu, tanba bele hahú tinan 2025 ho eventu importante no inkluzivu ida hodi agradese ba funsionáriu sira husi nível nasionál no munisipál, ba sira-nia servisu boot durante tinan tomak 2024, hanesan parte ida ne’ebé presiza rekoñese, tanba atu lori edukasaun ida ho kualidade, presiza iha esforsu kolaborativu.
“Prioridade prinsipál ba Ministériu Edukasaun iha tinan 2025 mak literasia no numerasia fundasionál. Labarik sira ne’ebé seidauk hatene lee di’ak to’o klase 3 sei susar liután atu rekopera aprendizajen iha futuru” dehan S.E. Ministra Edukasaun.
Governante ne’e hatutan, rezultadu husi teste no ezame sira, maske sa’e bebeik no hatudu ho konsistente katak estudante sira seidauk iha domíniu kona-ba kompeténsia báziku sira no halo sira susar atu kompriende konseitu sira ne’ebé avansadu no abstratu liu iha klase boot sira.
Prioridade boot ba tinan 2025, mak sei esforsu konsentradu atu ajuda labarik sira iha ne’e hanesan ho munisípiu seluk. Espesífikamente programa ALMA ho ninia modalidade foun, hahú iha ne’e fulan 5 liubá no agora mós sei la’o hamutuk ho EMULI atu sai efetivu liutá.
Fatin hanesan Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos hateten, hasoru malu ida ne’e atu husu ba malu saida mak atu halo iha tinan ida ne’e nian laran, husu Dirijente Edukasaun RAEOA nian atu jere eskola sira ho di'ak, dirijente eskola tenki iha koñesimentu ne'ebé di'ak, nune'e traforma ba eskola sira.
"Profesór sira tenki hadomi profisaun, tenki iha espíritu dezenvolvimentu maka’as, hodi dezenvolve rai Oe-Cusse, tinan 2025 tenki vizaun foun, hanoin foun, hodi dezenvolve eskola sira ne'e ho di'ak, husu ideia ba malu, dehan S.E. SEESG no ESTV.
#MédiaME
#jornalistaluis
