Hafoin Ministériu Edukasaun (ME) halo tiha diálogu ho reprezentante Eis-Profesorres Kontratadus (EKP) 2023 iha loron Segunda-feira, 3 de Fevereiru 2025 maka konsidera ba regra sira ne’ebé hatuur iha Dekretu-Lei N° 31/2023 de 31 de Maio nomós kondisaun sira balun, ME hakarak reafirma desizaun ME nian kona-ba pasu sira atu solusiona problema EPK 2023 ne’ebé mak la’o ona durante tinan ida resin hanesan tuir mai:
1) ME sei servisu hamutuk ho CFP oferese Teste Espesiál ba EKP 2023 ne’ebé prienxe kritériu atu sai profesór iha futuru;
2) Teste Epesiál nia sentidu katak teste ne’e oferese de’it ba grupu EPK 2023;
3) ME sei tetu hodi fó solusaun tuir regra ba estatutu EPK 2023 ne’ebé la prienxe kritériu tuir teste espesiál, tamba sira ho de’it diploma sekundária;
4) Solusaun sira ba problema EPK 2023 sei halo fazeadamente, sei hala’o uluk teste espesiál no ikus sei fó solusaun ba EPK 2023 ne’ebé mak ho de’it diploma sekundária;
Husi biban ne’e, ME mós hakarak esklarese katak liga ho teste espesiál ba EPK 2023 sei hala’o ho pasu sira hanesan tuir mai:
1) EPK 2023 sei hala’o teste dahuluk, hafoin loke teste jerál ba Bolsa Kandidatus Professores;
2) ME sei fasilita matrix (kisi-kisi) ba EPK 2023 atu estuda, prepara-an antes tuir teste. Matrix nu’udar matéria jerál ba teste espesiál nian. Espera katak ho preparasaun ne’ebé di’ak EPK 2023 sira sei hetan mós rezultadu diak iha teste;
3) Teste espesiál sei hahú halo ba ESG-Tec-Voc, hafoin teste ba nível Ensinu Báziku bazeia ba nesesidade;
4) Hakarak mós informa, iha teste Bolsa Kandidatus Professores iha tinan kotuk ne’ebé halo dala rua ona, iha EPK 2023 porvolta 200 resin mak passa iha teste sira refere. ME hakarak enkoraza ba EPK 2023 ne’ebé seidauk hola parte iha teste sira iha tinan kotuk, 2023 atu bele uza oportunidade di’ak iha teste espesiál, atu nune’e ita hotu-hotu bele kontribui ba edukasaun ida ho kualidade ba ita nia oan ka jerasaun sira iha futuru.
Mak ne’e de’it, ba atensaun tomak la haluha ami hato’o obrigadu wa’in.
Dili, 6 de Fevereiru 2023
Filipe Rodrigues Pereira
Porta Voz - ME
