Covalima, 11 Marsu 2026
Sua Exelénsia Ministra Edukasaun Dra.Dulce de Jesus Soares partisipa iha vizita ofisiál husi Sua Exelénsia Primeiru-Ministru Kay Rala Xanana Gusmão nian, hodi haree no dialogu ho autoridade no komunidade sira kona-ba preparasaun poder lokál ne'ebê tuir planu sei akontese iha tinan 2027.
Nune'e iha dialogu autoridade no komunidade sira preukupa ho setór edukasaun liga ho infra-estrutura, merenda eskolár no ekipamentu sira ba prosesu aprendizajen nian. Tanba ne'e Sua Exelénsia Ministra Edukasaun Dra.Dulce de Jesus Soares hatán, merenda eskolár tuir aprenzentasaun husi Prezidente Autoridade Munisipál nian hatudu pursentu 75 uza produtu lokál, tanba ne'e programa merenda eskolár iha Covalima la'o ho di'ak.
Iha parte seluk ligadu ho infra-estrutura Governante ne'e esplika, Ministériu Edukasaun agora dadaun servisu hamutuk ho Ministériu Planeamentu, Investimentu no Estratéjiku halo hela levantamentu ba dadus atu bele atualiza, nunee bele hatene eskola hira maka sei presiza halo hodi hatán ba preokupasaun komunidade no estudante sira nian.
"IX governu Konstitusional komprimitidu atu konstrui sala aula hamutuk 1.500 maibe bainhira ita halo levantamentu dadus hatudu ita presiza tan sala aula hamutuk 2.000 resin. Tanba fiar katak sei bele halo ida-ne'e durante mandatu", Dehan SE Ministra.
Rekorda mós katak Ministériu Edukasaun kontinua reorganiza servisu ministériu edukasaun atu bele haree nesesidade sira ne'ebé presiza hanesan, infraestrutura ka ekipamentu ne'ebé atu tulun estudante sira iha prosesu aprendizajen. Tanba Ministériu Edukasaun hakarak estudante hotu tenki kualidade no matenek atu bele serví estadu no lori nasaun ida ne'e ba oin.
#EliasdaCosta
#MédiaME
