Maliana – Loron, Kinta-Feira, 09 Janeiru 2025
Sua Exelénsia Ministra Edukasaun, Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos, husu ba manorin no kargu diretiva sira hotu atu tau responsabilidade boot hodi hala’o programa ne’ebé tuir kurríkulu eskolár determina ona.
Iha ámbitu enkontru ne’e, Sua Exelénsia Ministra Edukasaun Dra. Dulce de Jesus Soares, hateten, eskola mak save ba susesu Ministériu Edukasaun nian, tanba ne’e, profesór mak parte importante tebe-tebes iha funsionamentu eskola, atu nune’e bele aposta kualidade edikasaun ba labarik sira iha futuru.
“Iha enkontru ne’e hetan feedback di’ak tebe-tebes no mós hetan partisipasaun di’ak tebes, tanba ne’e pergunta no sujestaun sira ne’ebé ohin hato’o, ami rekolla, atu bele sai hanesan referénsia ba ami iha tinan 2025”, dehan S.E. ME.
Governante ne’e hatutan, Ministériu Edukasaun sei halo teste espesiál ba maluk sira ne’ebé mak iha tempu liubá konsidera hanesan eis-profesór kontratadu, tanba ne’e, sei dezeña teste espesiál ba sira, nune’e, sira bele konkore tuir vaga ne’ebé iha, liuliu iha área ensinu sekundáriu, tanba ne’e enkoraja maluk sira ne’ebé kontratu remata iha tinan 2023 atu bele mai tuir teste.
Iha fatin hanesan, Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos, hateten, ohin mai enkontru ho profesór no dirijente sira iha Edukasaun Munisípiu Bobonaru, atu priense fali hanoin foun, enerjia foun hodi halo atividade sira iha futuru ho di’ak, hodi alkansa objetivu Ministériu Edukasaun nian.
“Ministériu Edukasaun tau ona konfiansa ba profesór sira, tanba ne’e tenki lori konfiansa ne’e to’o rohan. Dirijente no manorin sira iha Munisípiu Bobonaru tenki servisu ho di’ak, tanba sai profesór ne’e hanesan vokasaun ida no koko sai espellu ba ema seluk”, dehan S.E. SEESG no ESTV.
#MédiaME
#jornalistaluis
