Likisa – Loron, Tersa-Feira, 07 Janeiru 2025
Sua Exelénsia Ministra Edukasaun Dra. Dulce de Jesus Soares no Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hamutuk ho profesór sira hotu husi Ensinu Pré-Eskolár to’o iha Ensinu Sekundáriu Jerál no Ensinu Sekundáriu Tékniku Vokasionál iha Munisípiu Likisa fahe rezultadu ne’ebé alkansa ona no dezafiu sira ne’ebé infrenta durante tinan 2024, no divulga planu asaun anuál no orsamentu Ministériu Edukasaun ba tinan 2025, iha salaun Munisípiu Likisa.
Iha dikursu, Sua Exelénsia Ministra Edukasaun Dra. Dulce de Jesus Soares hateten, bainhira temi liafuan ‘komunidade edukativu’ – ne’e mak sé loos? Iha nivel nasionál, ne’e mak ema hotu ne’ebé serbisu iha Ministériu Edukasaun no ita-nia parseiru sira hotu – Ministériu sira seluk, parseiru dezenvolvimentu sira, ONGs, no reprezentante sira hosi setór privadu ne’ebé envolve ho maneira ruma hodi haberan setór edukasaun.
“Komunidade edukativu ne’ebé importante liu mak iha nivel eskola. Eskola sira mak parte importante liu-husi setór edukasaun. Eskola bele hetan orientasaun, apoiu, no formadu hosi polítika no programa sira iha nivel nasionál no munisipál, maibé tuir loloos eskola ida-idak mak halo desizaun atu uza polítika no programa sira-ne’e, atu kria ambiente aprendizajen ida-ne’ebé di’ak liu no efetivu liu ba ninia manorin no estudante sira”, Tenik Ministra Edukasaun.
Aleinde ne’e, Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos informa, Ministériu Edukasaun nia responsabilidade boot ba assuntu Eduksaun iha ita nia rain-ida ne’e. Presiza ita hotu-hotu nia hamutuk, loron ohin ita mai iha ne'e hodi fahe hanoin ba malu, no husu ba dirijente no koordenadór eskola sira, imi-nia jestaun iha eskola ne'e atu hadi'a sistema prosesu Ensinu sira.
Governante ne’e husu mós ba Manorin na'in sira, formasaun ne'ebé maka imi hetan ne'e hodi kapasitasaun ba profesór sira, importante tebes hodi nune'e buat ne'ebé maka ita hetan iha formasaun ne'e atu bele transforma fali bá labarik sira, futuru rai ida ne'e presiza ita tenke iha prinsípiu ida-ne'ebé metin.
#Média ME
