MINISTRA EDUKASAUN HALA’O REUNIAUN HO DIRIJENTE SIRA HODI HAREE PLANU ASAUN ANUÁL MINISTÉRIU EDUKASAUN NIAN
Díli,14/09/2023 – Ministra Edukasaun Dra. Dulce de Jesus Soares hala’o reuniaun ho dirijente sira hodi haree planu asaun anuál Ministériu Edukasaun nian nune’e bele aliña ho programa IX Governu Konstitusionál, iha Salaun Delta Nova, Kinta-Feira ne’e.
Iha Reuniaun ne’e Ministra Edukasaun Dra. Dulce de Jesus Soares hateten, halo diskusaun hamutuk ho dirijente sira hodi halo planu anuál ba Orsamentu Jerál Estadu (OJE) 2024 ne’ebé inklui hotu servisu sira Ministériu Edukasaun nian.
“Iha Planu ne’e importante liu nivel ensinu tolu (3) hanesan Ensinu Pré-Eskolár, Ensinu Báziku no Ensinu Sekundáriu Jerál no Tékniku Vokasionál nomós iha Ministériu Edukasaun ko’alia ba sistema, tanba haree ba nivel ensinu, formasaun profesór/a sira nian, materiál didátiku, kuríkulu, avaliasaun, tanba ko’alia kona-ba kualidade edukasuan profesór/a sira hanesan parte ida importante tebes”, dehan Ministra Edukasaun.
Governante ne’e hatutan, Ministériu Edukasaun iha órgaun ida Asaun Konjunta Edukasaun Timor-Leste ne’ebé kompostu husi parseiru sira internasionál no nasionál ne’ebé iha interse ba área edukasuan atu nune’e bele aprezenta planu ne’ebé halo ona ba doadór sira hodi priense apoiu saida mak atu fó ba Ministériu Edukasun.
