𝗚𝗢𝗩𝗘𝗥𝗡𝗨 𝗟𝗔𝗡𝗦𝗔 𝗣𝗥𝗢𝗚𝗥𝗔𝗠𝗔 𝗘𝗞𝗢𝗡𝗢𝗠𝗜𝗔 𝗔𝗭𝗨𝗟 𝗜𝗛𝗔 𝗔𝗧𝗔Ú𝗥𝗢 𝗛𝗢𝗗𝗜 𝗦𝗘𝗟𝗘𝗕𝗥𝗔 𝗟𝗢𝗥𝗢𝗡 𝗠𝗨𝗡𝗗𝗜Á𝗟 𝗔𝗠𝗕𝗜𝗘𝗡𝗧𝗘

Ataúro, 5 Juñu 2025 – Governu Konstitusionál Da-9 ofisiálmente lansa programa Ekonomia Azul iha Autoridade Administrativa Ataúro, hanesan parte selebrasaun Loron Mundiál Ambiente nian, ho tema internasionál: “Mai Ita Redus Lixu Plástiku no Promove Ekonomia Azul”.

Iha serimónia lansamentu ne’e, Sua Exelénsia Primeiru Ministru Kay Rala Xanana Gusmão, parabeniza komunidade Ataúro, tanba sira-nia kontribuisaun importante ba preservasaun biodiversidade tasi-nian. Husi tara-bandu ne’ebé iha área sanulu resin rua (12) ho objetivu, atu povu Ataúro labele soe foer iha tasi no rai-maran, no mós halo esforsu atu prevene destruisaun ambientál.

“Parabéns ba Povu Ataúru tomak, tanba ho inisiativa tara-bandu iha área sira ne’e, ita bele hadi’a biodiversidade iha tasi-laran. Ita mós la bele tesi ai-arbiru no kuda ai-horis ba futuru, atu rai bele matak nafatin,” dehan Primeiru Ministru.

Durante lansamentu ne’e, fahe mós sertifikadu ba manán-na’in kompetisaun pintura, ne’ebé partisipa husi estudante sira iha Ataúro, hanesan forma valorizasaun ba kreatividade no konsientizasaun ambientál.

Serimónia ne’e, hetan partisipa husi lider governu, inklui S.E. Vise-Primeiru Ministru no Ministru Koordenadór Ekonómiku no Ministru Turizmu no Ambiente, Francisco Kalbuady Lay, S.E. Ministra Edukasaun, Dra. Dulce de Jesus Soares, no membru sira seluk husi Governu Konstitusionál Da-9, no mós komunidade, profesór no estudante sira.

Hafoin atividade iha Ataúro remata, kontinua kedas mai Díli, hodi partisipasaun iha abertura feira produtu lokál iha Portu Díli, hanesan parte ida selebrasaun Loron Mundiál Ambiente nian, ne’ebé fó valór ba produtu sustentável no promosaun ekoturizmu.

#MédiaME