Manatuto – Loron Kinta-Feira, 13 Fevereiru 2025
Sua Exelénsia Ministra Edukasaun Dra. Dulce de Jesus Soares akompaña husi Prezidente Autoridade Munisípiu Manatutu, Sr. Luís Inacio Henriques Fernandes, hala’o sorumutu ho manorin sira husi territóriu Munisípiu Manatuto hodi ko’alia kona-ba progresu no dezafiu servisu ne’ebé durante ne’e infrenta iha tinan 2024 inklui mós planu, programa no orsamentu Ministériu Edukasaun nian ba tinan 2025. Sorumutu ne’e hala’o iha Salaun Agrikultura, Munisípiu Manatuto.
Iha diskursu, Sua Exelénsia Ministra Edukasaun Dra. Dulce de Jesus Soares, hateten, komunidade edukativu importante iha nível eskola, tanba eskola sira mak parte importante liu hosi sektór edukasaun. Eskola bele hetan orientasaun, apoiu, no formadu hosi polítika no programa sira iha nivel nasionál no munisipál, maibé tuir loloos eskola ida-idak mak halo desizaun atu uza polítika no programa sira-ne’e hodi kria ambiente aprendizajen ida-ne’ebé di’ak no efetivu liu ba ninia manorin no estudante sira.
“Komunidade edukativa mak ema hotu ne’ebé serbisu iha Ministériu Edukasaun no ita-nia parseiru sira hotu inklui Ministériu sira seluk, parseiru dezenvolvimentu sira, ONGs, no reprezentante sira hosi setór privadu ne’ebé envolve ho maneira ruma hodi haberan ita-nia sektór edukasaun”, dehan S.E. Ministra Edukasaun.
Governante ne’e hatutan, lider eskolár efetivu ida hatene katak kolaborasaun no kooperasaun mak xave atu asegura kualidade no susesu. Manorin sira presiza foti responsabilidade ba sira-nia sala-aula, pedagojia no prosesu ensinu. Estudante sira presiza motivadu no envolvidu hodi foti knaar ativu iha sira-nia prosesu aprendizajen ho vizaun momoos kona-ba oinsá prosesu ne’e liga metin ho sira-nia susesu aban bainrua.
#MédiaME
