Baucau - Loron Sesta-feira, 14 fevereiru 2025
Sua Exelénsia Ministra Edukasaun Dra. Dulce de Jesus Soares, akompaña husi dirijente sira Ministériu Edukasaun nian, hala'o vizita ba Eskola Ensinu Báziku Sentrál 3⁰ siklu (EBC-sigla portugues), hodi haree direta kondisaun eskola nian no husu estudante sira atu estuda maka'as liután, nune'e bele hetan valór di'ak iha ezame nasionál.
Iha vizita ne'e Sua Exelénsia Ministra Edukasaun Dra. Dulce de Jesus Soares, hateten, kontenti tebes bele mai vizita eskola EBC Uailili no haree resintu ne'e moos no parteleira ba livru ne'e moos no organizadu, tanba ne'e husu atu mantein resintu moos no halo di'ak liután, nune'e estudante sira iha vontade diak liután hodi aprende.
"Ezame nasionál iha tinan ida ne'e ami hakarak eskola EBC Uailili nia estudante sira nia valór bele tama iha média (valór di'ak), tanba ne'e husu ba profesór sira tenki hanorin ho didi'ak no ita promete ba malu katak tinan oin Ministériu aviza, Uailili tenki tama ona", dehan S.E. Ministra Edukasaun.
Governante ne'e hatutan, hetan valór iha ezame nasionál, la todan importante estuda, fahe livru ba estudante sira lori ba uma hodi estuda, nune'e dader labele mai kopia fali iha livru hodi lakon tempu, estudante sira mós kopia laloos no ladún iha tempu ba esplikasaun, maibé estudante bainhira lakompriende, husu ba profesór sira atu bele hatán ho didi'ak, nune'e bele tuir ezame nasionál ho loloos.
Hafoin remata tiha vizita iha Eskola Ensinu Báziku 3⁰ siklu Uailili, kontinua kedas ba vizita eskola Ensinu Báziku Sentrál Gari-Uai, iha Postu Administrativu Baucau-Vila, Munisípiu Baucau no mós Eskola Ensinu Báziku Sentrál Bimali, Larigutu, Postu Administrativu Ossu, Munisípiu Viqueque.
#MédiaME
