DÍLI - Kuarta-feira, 12-02-2025
Ministériu Edukasaun liuhosi Diresaun Nasionál Sistema Informátika no Téknolojia (DNSIT) hala’o sosializasaun Programa Tele-Eskola ba Diretór Eskola Públiku sira iha salaun Servisu Edukasaun Munisípiu Díli.
Iha sosializasaun ida-ne'e, Diretór Nasionál DNSIT Jónio Guterres Rosario hatete, objetivu prinsipál iha atividade ida-ne’e atu fahe informasaun ba Diretór eskola sira kona-ba planu Ministériu Edukasaun nian, liu-liu Programa Tele-Eskola.
Nia hatutan, Programa ida-ne’e realiza tanba Lei Nú. 14/2008, 29 Outubro, Lei de bases da Educação, iha artigu 32° “Educação a Distância” fó dalan ba Ministériu Edukasaun liuhosi DNSIT atu realiza programa aprendizajen distánsia.
Diretór ne’e define katak, Tele-Eskola mai hosi lian Grego “Tele” katak “Dook” ka “Distánsia”. Entaun, Tele-Eskola signifika aprendizajen distánsia. Nune’e, Ministériu Edukasaun kria kanál Youtube ida hanaran Tele-Eskola hodi upload vídeo sira ho konteúdu edukativu ba matéria siénsia sosiál no siénsia naturál.
Programa Tele-Eskola mosu iha períodu Covid-19 hodi substitui aula prezensiál iha territóriu laran tomak. No programa ida-ne’e kontinua la’o nafatin sai hanesan aula komplementar ka aula reforsu ba estudante sira bele aprende liuhosi online, kanál Youtube Tele-Eskola, hodi bele aumenta sira-nia koñesimentu.
Ministériu Edukasaun Públika ona vídeo iha Kanál Youtube Tele-Eskola nian hamutuk 565, Epizódiu hamutuk 511 no subscritór sira hamutuk rihun 7,449.
Sosializasaun ida-ne’e partisipa másimu hosi Xefe Departamentu Ensinu Munisípiu Díli, Superintendente Munisípiu Díli no Diretór Eskola Públiku sira Munisípiu Díli nian.
#MédiaMEJornalistaEmilio
