Viqueque - Loron Sábado , 15 Fevereiru 2025
Sorumutu ho profesór sira hotu husi munisípiu Viqueque, iha loron Sábado ne’e, Sua Exelénsia Ministra Edukasaun Dra. Dulce de Jesus Soares, husu ba profesór sira hotu, hodi bele implementa to’os eskolár, tanba sai parte integrál husi kurríkulu primeiru no segundu siklu nian.
Iha diskursu, Sua Exelénsia Ministra Edukasaun Dra. Dulce de Jesus Soares, hateten, to’os eskolár mak sai parte integrál hosi kurríkulu primeiru no segundu siklu nian, no hahú tinan oin mós sei sai parte hosi kurríkulu terseiru siklu, nune’e, muru presiza duni atu bele implementa kurríkulu ho loloos.
"Ba eskola sira-ne’ebé seidauk iha muru, ha’u enkoraja ita-boot sira atu serbisu hamutuk ho komunidade edukativu atu harii muru. Governu fó konsesoens eskolares atu garante aplikasaun ba kurríkulu ho loloos, nune’e to’os eskolár sira mak obrigatóriu. Ha’u mós haree eskola balu ne’ebé harii lutu kapás liuhosi programa Hafurak Eskola", dehan S. E. Ministra Edukasaun.
Governante ne’e hatutan, se laiha lutu imposivel prevene animál sira tama ba to’os eskolár. Ba eskola sira-ne’ebé iha ona lutu, sei halo koordenasaun ho Secretaria de Estado das Florestas atu kuda ai-oan. Ai sira mak forma efetivu liu atu fó mahon no halo edifísiu fresku, no liuliu durante loron manas ne’e importante tebes atu estudante no manorin sira, bele konsentrasaun tomak ba prosesu ensinu-aprendizajen.
Aleinde ne'e, Governu Konstitusionál Da-9, oras ne’e sei tetu hela aumenta profesór sira-nia saláriu. Maibé, kualkér aumentu tenke bazeia ba méritu, no ida-ne’e implika dezempeñu. Tinan ida-ne’e sei halo esforsu konsertadu atu aumenta estudante sira-nia rezultadu aprendizajen, no hanesan ne’e, hasa’e profesór nia saláriu tenke liga ho susesu estudante sira-nian no eskola sira-nia kualidade.
Bazeia ba ida-ne’e, husu ba profesór sira-ne’ebé hanorin ona tuir kurríkulu estipula atu halo esforsu liután hodi hanorin no apoia alunu sira ho di’ak liu no kriativu liu. No ba profesór sira-ne’ebé sei to’o eskola tarde, la tuir planu lisaun sira ho loloos, no seidauk implementa atividade estrakurrikulár no aula reforsu sira, atu sai responsavel liu no deside atu sai reprezentante di’ak liu ba profisaun iha tinan 2025.
#MédiaME
