Dili – Loron Tersa-feira, 11 Marsu 2025
Ministériu Edukasaun realiza semináriu sensibilizasaun kona-ba prevensaun asédiu sexuál iha servisu públiku, ho tema ,“Promove Servisu Fatin ne’ebé Seguru, Respeitozu no Livre husi Asédiu”. Nune’e, husu atu eskola bele sai fatin ne’ebé seguru ba manorin, estudante no komunidade edukativa tomak. Semináriu ne’e realiza iha Suai Room, Timor-Plaza.
Iha entrevista, Sua Exelénsia Ministra Edukasaun, Dra. Dulce de Jesus Soares, hateten, semináriu ne’e realiza iha ámbitu komemorasaun ba loron internasionál feto, tanba ne’e mak Ministériu Edukasaun realiza semináriu ida kona-ba prevensaun asédiu sexuál iha servisu públiku, nune’e bele garante ambiente ne’ebé seguru ba ema hotu iha eskola, sevisu fatin no fatin públiku hotu.
“Agora dadauk Ministériu Edukasaun halo hela sosializasaun iha kada munisípiu, nune’e bele hasa’e ema nia konsénsia, atu konsidera eskola sai hanesan ambiente ne’ebé seguru ba profesór, estudante no ba komunidade edukativa tomak”, dehan S.E. Ministra Edukasaun.
Governante ne’e akresenta, iha kurríkulu introduz ona ba matéria hotu-hotu kona-ba igualidade jéneru, proibisaun asédiu sexuál no fraternidade umana, matéria sira ne’e la’os hanesan disiplina ida ne’ebé hamriik mesak, maibé integradu iha disiplina hotu-hotu ne’ebé ko’alia kona-ba papél husi labarik feto no mane nian, nune’e bele hanorin labarik sira atu oinsá bele respeita malu iha sala-laran, iha eskola no iha fatin sira seluk.
#MédiaME
