Manatutu – Loron Segunda-feira, 10 Marsu 2025
Sua Exelénsia Ministra Edukasaun Dra. Dulce de Jesus Soares, halo abertura ba kursu formasaun espesializada iha administrasaun no jestaun eskolár ba dirijente foun eskola nian hamutuk na’in 107, husi territória Munisípiu Manatutu, iha Salaun Parókia St. António Manatutu.
Hafoin abertura, Sua Exelénsia Ministra Edukasaun Dra. Dulce de Jesus Soares, hateten, formasaun ne’e fó de’it ba dirijente eskola sira hanesan, Diretór Eskola, Adjuntu, Koordenadór Filiál no mós Koordenadór Pré-Eskolár nian no iha formasaun ne’e sei hetan matéria sira hanesan administrasaun eskolár, jestaun eskolár, fraternidade umana no kurríkulu.
“Formasaun ne’e la’o durante semana ida nia-laran ho objetivu mak, iha tinan 2024 ita nomeia kargu diretiva sira, hanesan diretór, adjuntu, koordenadór filiál no koordenadór pré-eskolár, sira ne’e foun, tanba ne’e formasaun ne’e hanesan bukae ida ba sira, nune’e bele iha koñesimentu hodi jere eskola ne’e ho di’ak”, dehan S.E. Ministra Edukasaun.
Governante ne’e hatutan, matéria ba formasaun ne’e importante tebes ba dirijente eskola sira, nune’e sira bele jere eskola, tanba eskola ne’e hanesan instituisaun ida ne’ebé presiza iha jerente ida hodi jere no tau matan kona-ba funsionamentu eskola, implementasaun kurríkulu, prosesu avaliasaun ba ensinu aprendizajen, nune’e prosesu sira hotu iha eskola bele la’o ho di’ak.
Hafoin remata tiha abertura ba kursu formasaun administrasaun no jestaun eskolár ba dirijente foun eskola nian, Sua Exelénsia Ministra Edukasaun ho ekipa kontinua hala’o vizita ba eskola CAFE iha Munisípiu Manatutu.
#MédiaME
