Liquiça - Kuarta-feira, 5 Fevereiru 2025
Sua Exélensia Sekretáriu Estadu ESG no ESTV Sr. Domingos Lopes Lemos, hamutuk ho Diretór Jerál, Deolindo da Cruz, Diretór Nasionál ESTV Sr. Fernando M. Gama, Destintu Deputadu Sr. Leandro Lobato komisaun F, Reitór ETCI Sr. Mateus de Jesus Maia, Inspetór servisu Edukasaun Munisípiu Liquiça, Autoridade lokál, suku Leorema halo Lansamentu ba Departamentu Plantasaun Foun Kafé no Indústria iha ESTV Leorema Munisípiu Liquiça.
Iha intervista Sua Exélensia Sekretáriu Estadu ESG-ESTV Sr. Domingos Lopes Lemos, hateten "loron ohin ita hamutuk iha fatin ne’e, hodi halo lansamentu ba Departamentu ba kursu foun ne’ebé mak ko'alia liu ba plantasaun kafé, tuir polítika Ministériu Edukasaun no Governu liu husi Sekretáriu Estadu, ita tau prioridade importante los iha kada rejionál no Munisípiu, tanba haree hosi parte ida suku Leorema ne’e nia pontensiál ida mak produtu kafé ho nune’e mak loron ohin ita mai lansamentu tan kursu foun iha eskola refere"
Tanbá ne’e Ministériu Edukasaun iha planu no nafatin investimentu, atu situasaun ne’e ita foin mak kria hodi nune’e iha ona planu ba futuru sei halo investimentu ho didi’ak ba Departamentu ne’ebé mak foin eziste.
“Governante ne’e hatutan-tan katak, foin mak tinan dahuluk ita kria kursu foun ne’e iha eskola Sekundáriu Téknika Vokasionál agríkola Prezidente Nicolau Lobato Leorema, no planu ita sei ba iha Ermera hanesan área ne’ebé mak produsaun kafé mak bo'ot no ita haree mós eskola tékniku vokasionál ida iha ne’eba, hodi haree kondisaun eskola ho nia Departamentu sira la relasiona ho situasaun iha terenu, ita fó ona Xamada atensaun atu sira lalika kontinua maibé ita sei tau prioridade liu ba iha kursu plantasaun kafé "dehan sua Exélensia Sekretáriu Estadu ESG-ESTV”.
Hafoin lansamentu Sua Exélensia ho ekipa kuda mós ai-horis sira mak hanesan kuda kafé oan iha resintu eskola Tékniku Vokasionál agríkola Prezidente Nicolau Lobato Leorema Munisípiu Liquiça.
#MédiaME.
