Dili – Loron Kinta-feira, 06 Fevereiru 2025
Sua Exelénsia Ministra Edukasaun Dra. Dulce de Jesus Soares, hala’o enkontru ho Assesora Komisaun D ba Asuntu Ekonomia no Dezenvolvimentu, Parlamentu Nasionál, Dra. Brígida Correia ho ekipa, hodi ko’alia kona-ba planu komisaun D Parlamentu Nasionál nian, atu halo semináriu ida kona-ba polítika utilizasaun produtu lokál iha merenda eskolár. Enkontru ne’e hala’o iha Salaun VIP-ME, Vila-Verde.
Iha enkontru, Assesora Dra. Brígida Correia, hateten, polítika governu nian katak, pursentu 75% utiliza produtu lokál, maibé durante ne’e rona katak, produtu ne’ebé mak iha ita-nia rai la sustentável no sempre iha razaun para ema importa produtu lokál ne’e husi rai-liur, tanba ne’e mak ohin mai hamutuk atu buka solusaun ba asuntu refere.
“Iha mós peskiza ida kona-ba asuntu produtu lokál iha merenda eskolár no peskiza ne’e remata, sei aprezenta iha semináriu, atu buka solusaun kona-ba saida mak ita preokupa iha ita-nia nasaun no peskiza refere sei apoiu husi Gabinete Polítika Jéneru UNTL”, dehan Assesora.
Assesora Komisaun D ne’e hatutan, iha ona livru kona-ba menú ka reseita husi produtu lokál ba merenda eskolá ne’ebé haree ba nia proteiña, karbohidratu, vitamina no minerál, liuhusi servisu hamutuk entre Ministériu Edukasaun no WFP hodi fó sai ona ba kada eskola atu uza menú ne’ebé mak iha ona, maibé infelizmente seidauk uza menú ne’e ho di’ak, tanba ne’e mak buka atu halo peskiza ida hodi buka solusaun ba problema ne’e.
Aleinde ne’e, aprezenta mós proposta ida kona-ba kurríkulu edukasaun fízika ba síklu dahuluk, daruak no datoluk, atu buka oinsá mak parte Ministériu Edukasaun toma konsiderasaun hodi bele apoiu peskiza ida ne’e.
#MédiaME
