ME PARTISIPA IHA ATIVIDADE MARSA BA PAZ “PEACE RUN”

Dili – Loron Tersa-Feira, 04 Fevereiru 2025 Sua Exelénsia Ministra Edukasaun Dra. Dulce de Jesus Soares, partisipa iha atividade marsa ba paz (tocha da paz), hodi fó mensajen paz ba ema hotu-hotu hodi bele kontribui ba dezenvolvimentu iha rai-laran, atividade ne’e realiza iha resintu Parlamentu Nasionál. Iha entrevista, Sua Exelénsia Prezidente Parlamentu Nasionál Dra. Maria Fernanda Lay, hateten, ohin komemora marsa ba paz ho tocha ne’ebé ohin sunu, bele fó mensajen paz ba ema hotu no espera katak sei kontinua ba mundu hodi iha paz no trankuilidade hodi bele halo dezenvolvimentu. “Mensajen sira husi marsa ba paz ida ne’e, bele lori paz mai ita-nia rai, mai ita-nia família, mai ita-nia viziñu no povu timor tomak, maske iha diferente, maibé ita nasaun ida. Ho diferénsia sira ne’ebé iha, mak ita bele iha diálogu hodi rezolve problema”,dehan S.E. PPN. Iha fatin hanesan, Diretór Ezekutivu Peace Run, Salil Wilson, hateten, paz ne’e hahú husi armonia, husi laran-luak, fuan-boot no hahú husi ema idak-idak, depois ba família nia laran, hafoin buras hodi halo buat di’ak no bainhira ema hotu halo di’ak mak sei inspira ema hotu iha mundu. “Ema hotu-hotu bele muda mundu, la’os de’it polítiku sira, bainhira ita hatudu laran luak, vontade di’ak, iha paz, ida ne’e sei muda mundu, maibé ida ne’e bele akontese, bainhira ita iha parseria, ami mós mai iha ne’e, tanba iha kolaborasaun ka servisu hamutuk ho Ministériu Edukasaun no Ministériu Juventude, Desportu, Arte no Kultura hodi bele posibilita servisu preparativu sira ne’e atu ema hotu bele tuir. Atividade marsa ba paz “Peace Run” ne’e, sei la’o durante loron haat, hahú husi dia 4 to’o dia 8 fulan fevereiru, husi atividade ne’e sei hala’o vizita ba eskola sira iha Dili, Liquiça no Hera, no dia 7 agora sei halai kilómetru 7 hodi hale’u sidade Dili. Atividade ne’e, hetan partisipasaun husi S.E. Prezidente Parlamentu Nasionál Dra. Maria Fernanda Lay, S.E. Vise-Primeiru Ministru, Ministru Koordenadór Assuntu Ekonómiku no Ministru Turizmu no Ambiente, Sr. Francisco Kalbuadi Lay, S.E. Vise-Primeiru Ministru, MCAS no Ministru Dezenvolvimentu Rurál no Habitasaun Komunitária, Eng. Mariano ASSANAMI Sabino, S.E. Vise-Ministru Administrasaun Estatal, Sr. Jacinto Rigoberto Gomes de Deus, S.E. Sekretáriu Estadu Floresta, Eng. Fernandino Vieira da Costa, membru Parlamentu Nasionál, Delegasaun Peace Run husi rai-liur, profesór no estudante sira. #MédiaME