Dili, loron 07 fulan Fevereiru tinan 2025
Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, partisipa iha serimónia graduasaun ba dala-13 Eskola Téknika Informátika Dili (ETI) Dili ba Tinan 2025, iha sala Auditorium IOB plaza Fomento II, Sesta-feira ne’e.
Iha intervensaun Sua Exelénsia Sekretáriu Estadu ESJ-ESTV hateten, Graduadu sira husi ETI nian agora iha koñesimentu klean liu kona-ba siénsia no teknolojia, abilidade esensiál sira iha era Globalizasaun nian. Edukasaun ne'ebé estudante ETI hetan la'ós de'it konjuntu koñesimentu tékniku, maibé mós meiu ida-ne'ebé justu atu fó kbi'it ba jerasaun foun sira hodi hanoin ho krítiku, kria no halo inovasaun, tulun iha dezenvolvimentu ba nasaun doben neʼebé hasoru dezafiu iha sékulu 21.
"Ha'u enkoraza estudante hotu-hotu atu kontinua aprende, atu mantein kuriozidade, no buka nafatin dalan sira atu halo inovasaun. Mundu muda beibeik, no imi iha kapasidade atu la'ós de'it la'o tuir, maibé atu lidera mudansa ne'e. Imi maka jerasaun profisionál sira tuir mai ne'ebé sei forma futuru ita-nia nasaun nian iha área sira hanesan Teknolojia Informasaun, Siénsia Informátika, no seluk tan", dehan Governante ne'e.
Governante ne’e mós hatutan, aproveita oportunidade ida-ne'e agradese ba profesór no funsionáriu sira iha ETI ne'ebé dedika sira-nia tempu, koñesimentu no dedikasaun tomak hodi garante katak hotu-hotu hetan Edukasaun ida ho kualidade.
Estudante ETI ne'ebé graduasaun iha tinan 2025 kompostu husi Departamentu Tékniku linguajen no programasaun, Tékniku Jestaun Ekipamentu Informátika, Tékniku Multimédia, Tékniku Konstrusaun Sivil, Tékniku Eletrisidade, Tékniku Eletrónika, Audio Vídeo no TV, Tékniku Kontabilidade, Tékniku Komérsiu no Tékniku Hotelária no Turismo.
#MédiaME
