Dili – Loron Sexta-feira, 07 Fevereiru 2025
Sua Exelénsia Ministra Edukasaun Dra. Dulce de Jesus Soares hamutuk ho Sua Exelénsia Primeiru Ministru, Kay Rala Xanana Gusmão, akompaña, Vise-Primeiru Ministru, MCAS no Ministru Dezenvolvimentu Rurál no Habitasaun Komunitária, Eng. Mariano ASSANAMI Sabino, no membreu Governu Konstitusionál Da-9 nian, inklui mós profesór no estudante sira husi eskola sira iha Dili, partisipa iha atividade korrida paz, hahú husi resintu Parlamentu Nasionál hodi la’o to’o iha Estadiu Munisipál Dili.
Iha atividade ne’e, Sua Exelénsia Primeiru Ministru, Kay Rala Xanana Gusmão, hateten, Sri Chinmoy hanesan ema ida ne’ebé sempre tau iha nia hanoin no esforsu tomak ba harii paz iha mundu, tanba ne’e ita hola parte iha asaun ida ne’e hanesan ho nasaun seluk, ho asaun ida ne’e atu fanu sosiedade kona-ba paz, dame, nune’e, ne’e ohin kontenti, tanba imi jerasaun foun mak mai partisipa.
“Husi asaun ida ne’e, imi bele hanoin dadauk ona, katak dame importante tebes no sai baze ba buat hotu, husi ita-nia fuan rasik, iha uma-laran, iha komunidade no iha sosiedade, tanba ne’e ba imi estudante tenki tau iha imi-nia hanoin, nune’e aban-bainrua bele lembra fali katak, ha’u mós hola parte iha korrida ba paz”, dehan S.E. PM.
Xefe Governu ne’e hatutan, ho domin tomak haku’ak imi, hodi husu no espera katak, imi tau tau duni liafuan paz ne’e, iha imi-nia ulun, imi-nia fuan no iha imi-nia hahalok loron-loron, tanba ne’e importante tebes ba imi estudante sira atu kuda dame, harii dame no fahe dame, hodi Timor-Leste bele la’o ba oin.
#MédiaME
