Dili, loron 19 fulan Fevereiru 2025
Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, hala'o enkontru ho Embaixadór Timor-Leste ba Xina Sr. Loro Horta, iha sala VIP Ministériu Edukasauan Vila Verde, Dili, Kuarta-feira ne'e.
Iha intervista Sua Exelénsia Sekretáriu ESJ-ESTV Sr. Domingos Lopes Lemos, hateten agradese ba Embaixadór Timor-Leste ba Xina ne’ebé ohin mai vizita Ministériu Edukasaun, ohin halo diskusaun kona-ba andamentu sira iha área téknika Vokasionál ba bolsa estudu sira ne’ebé nasaun Xina atu oferese ba eskola téknika vokasionál.
"Governu Xina sei oferese bolsa estuda ba timor oan sira liliu iha área téknika vokasionál, ne’ebé mak tutela ba iha Sekretáriu Estadu ESJ-ESTV, espera katak ho bolsu estudu ne’ebé Governu Xina fó bele hetan vantajen di’ak ba timor oan hotu", dehan Governante ne'e.
Fatin hanesan Embaixadór Timor-Leste ba Xina Sr. Loro Horta hateten, bolsu estudu ne’ebé mak Governu Xina sei oferese ba Timor-Leste liu husi Ministériu Edukasaun liliu iha área téknika vokasionál mak hanesan área agrikultura, Peska no Pekuária.
"Bolsu estudu iha nasaun Xina presiza bolseiru na’in 10 no Governu Provinsi Huang presiza bolseiru na’in 5, bolseiru ne’e sei hahú iha tinan ida ne’e nia laran", hateten Embaixadór Timor-Leste ba Xina Sr. Loro Horta.
Enkontru ne’e partisipa husi Diretór Jerál Ensinu Sekundáriu Sr. Deolindo da Cruz, Diretór Nasionál ESTV Sr. Fernando M. Gama, Xefe Gabinete Sekretáriu Estadu ESJ-ESTV Sr. Napoleão de Araújo Santos Lima, asesora Ministra Edukasaun Sra. Jacinta Hanjam Corbafo.
#MédiaME
