Manatuto, 13/08/2024
Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, halo abertura kompetisaun sertame nivel nasionál ensinu sekundáriu jerál ho objetivu atu komemora loron Konsulta Populár 30 Agosto ba dala-25, iha Munisípiu Manatuto tersa-feira ne’e.
Iha diskursu Sua Exelénsia Sekretáriu Estadu ESJ-ESTV Sr. Domingos Lopes Lemos hateten, sertame ne’e iha planu anuál diresaun nasionál ensinu sekundáriu jerál ho tema Edukasaun mak fatin esperansa no transformasaun ba sidadaun, tanba ne’e, edukasaun mak xave ba futuru ida di’ak liu, ne’ebé estudante ida-idak iha oportunidade atu dezenvolve ninia poténsia tomak.
“Objetivu prinsipál husi atividade sientífiku ida ne’e atu motiva estudante Ensinu Sekundáriu Jerál sira atu dezenvolve hanoin krítiku, aplika sira-nia koñesimentu no kapasidade ne’ebé sira hetan liu-liu atu hetane istória pasadu ne’ebé alin sira seidauk hatene kona-ba ita-nia nasaun”, dehan Sua Exelénsia Sekretáriu Estadu ESJ-ESTV Sr. Domingos Lopes Lemos.
Governante ne’e hatutan, kompetisaun ne’e sei hala’o iha sentru rejionál tolu, parte Leste realiza iha Manatuto inklui iha eskola Baucau, Lautem, Viqueque no nia sentru iha Manatuto, parte sentru realiza iha Munisípiu Aileu, eskola sira ne’ebé partispa husi Díli, Ainaro, Manufahi, Covalima no Aileu rasik, parte Oeste nian realiza iha Munisípiu Ermera no eskola sira ne’ebé partisipa mak Atauro, RAEOA, Bobonaro, Liquiça no Ermera.
Iha fatin hanesan Sekretáriu Munisípal Asuntu Sosial Sr. Natalino M. Carvalho agradese ba Ministériu Edukasaun ne’ebé realiza sertame ida ne’e bele sukat estudante sira nia forsa, kapasidade hodi hatene prosesu aprendizajen husi momentu ida ne’e bele akompaña, bele asiste saida mak estudante aprezenta liu husi prosesu tinan naruk nian laran.
“ita-boot sira mak reprezenta ona eskola hotu hosi Munisípiu haat tanba ita-boot sira mak espesiál hosi selesionadu kada eskola sira iha ita-boot sira nia Munisípiu ida-idak”.
Iha sertame ne’e Sua Exelénsia Sekretáriu Estadu ESJ-ESTV Sr. Domingos Lopes Lemos akompaña husi Diretór Jerál Ensinu Sekundáriu, Diretór Nasionál Ensinu Sekundáriu Jerál, Dirijente Ministériu Edukasuan no reprezenta Autoridade Munisípiu Manatuto, inan aman Profesór/a no partisipante sira.
#MédiaME
