Díli – Segunda-Feira, 12 agustu 2024
Sua Exelénsia Ministra Edukasaun Dra. Dulce de Jesus Soares no Sekretáriu Estadu Ensinu Sekundáriu Jerál no Tékniku Vokasionál Sr. Domingos Lopes Lemos hamutuk ho dirijente sira Ministériu Edukasaun nian halo aprezentasaun tuir tetu orsamentu ne’ebé simu husi Ministériu Finansas ho montante milloens $ 99 ba Komisaun Revizaun Orsamentu (KRO), iha Salaun Ministériu Finansas, Ai-Tarak Laran.
Iha entrevista, Sua Exelénsia Ministra Edukasaun Dra. Dulce de Jesus Soares, hateten, orsamentu ho montante $ 99 miloens ne’e, aloka ona ba kategoria saláriu vensimentu, bens servisu, transferénsia públika no sei halo diskusaun separada ida kona-ba kapitál menór no kapitál dezenvolvimentu.
“Servisu sira ne’e hotu atu fó kontinuidade ba servisu Ministériu Edukasaun nian iha área saláriu vensimentu, saláriu profesór, kurríkulu, jestaun eskolár no servisu rutiña Ministériu Edukasaun iha nivel eskolaridade iha nivel nasionál no munisipál”, dehan Ministra Edukasaun.
Governante ne’e hatutan, ezekusaun orsamentu Ministériu Edukasaun nian la’o di’ak tebe-tebes no atinje ona milloens $ 51 no tuir observasaun ne’ebé Ministériu Finansas halo katak to’o fim dezembru ho kontinua ezekusaun tuir ritmu hanesan ne’e mak sei atinje pursentu 90%.
#MédiaME
