Bobonaro – loron, kinta-feira, 15 agustu 2024
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hamutuk ho Komisaun Funsaun Públika fó posse ba manorin na’in hamutuk 491, iha Munisípiu Bobonaru.
Iha diskursu, Sua Exelénsia Ministra Edukasaun Dra. Dulce de Jesus Soares, hateten, tuir lei, manorin sira tenke to’o iha eskola ho oras no fila ho oras ne’ebé determina, no fó laran 100% ba serbisu di’ak durante iha resintu eskolár, tanba mi iha devér atu halo planu no preparasaun ba aula, inklui kria materiál didátiku relevante.
“Imi presiza trata estudante sira hotu ho igualdade no lahó diskriminasaun hodi buka nafatin métodu sira ne’ebé di’ak liu atu tulun estudante ida-idak no garante ninia aprendizajen. Imi mós iha responsabilidade atu kria no mantein relasaun di’ak liu ho inan-aman, mahein no membru komunidade sira no konserteza labele envolve ona iha tipu hahalok ne’ebé kriminozu’, dehan Ministra Edukasaun.
Governante ne’e hatutan, imi-nia problema rezolve ona no sei simu saláriu fulan-fulan tuir oráriu, imi agora metin ona iha sistema, no hetan kondisaun sira-ne’ebé merese duni, nune’e agora konsentra ba kria relasaun respeitozu ho membru komunidae sira no relasaun domin ho imi-nia estudante sira, hodi promove sira-nia susesu.
Iha fatin hanesan, Sua Exelénsia Sekretáriu Estadu ESJ-ESTV Sr.Domingos Lopes Lemos hateten, posse ne’ebé mak imi simu ne'e la'ós priviléjiu boot ida, maibé hanesan responsabilidade ne’ebé simu hodi hanorin no edukaTimoroan sira.
"Profesór ne’ebé di'ak loron-loron hanorin estudante sira iha aula laran hodi transforma estudante sira liu-husi siénsia no profesór tenke domina matéria no kumpri devér hodi hanorin estudante sira ho di'ak liután.
Aleinde ne’e, Sua Exelénsia Prezidente Komisaun C Parlamentu Nasionál, Distinta Deputada Cedelizia Faria dos Santos, hateten, ba manorin sira tenki hanorin estudante sira ho di’ak atu ba oin sira bele lidera fali nasaun ida ne’e, labele abandona estudante sira iha aula laran no husu atu kumpri oras hanorin ne’ebé iha, nune’e sira mós bele aproveita lisaun ho di’ak.
“Foin lalais Parlamentu Nasional mós kria tiha rezolusaun ida kona-ba eis professores kontratadu hodi halo polémika ida ne’e sai bo’ot liutá, maibé ha’u hakarak dehan katak rezolusaun Parlamentu ne’e iha pontu importante rua. Iha pontu daruak hateten, ema ne’ebé atu sai profesór tenki tuir teste liuhusi bolsa kandidatura, tanba ne’e desizaun ne’ebé Ministériu foti ne’e tuir hela lei, tanba ne’e ami iha Parlamentu fó ami nia suporta tomak”.
Serimónia tomada de posse ne’e, hetan partisipa husi S.E. Prezidente Autoridade Munisípiu Bobonaro, Sr. Alexandre Pires, S.E. Prezidente Komisaun C Parlamentu Nasionál, Distinta Deputada Cedelizia Faria dos Santos, S.E. Prezidente Komisaun F Parlamento Nasionál, Distinta Deputada Maria Barreto, Komandante PNTL, Komandante F-FDTL, Lia-Na’in no seluk tán.
#MédiaME
