Bobonaro, loron 21 fulan Fevereiro 2025- Sua Exélensia Sekretáriu Estadu Ensinu Sekundáriu Tékniku Vokasionál Sr. Domingos Lopes Lemos entrega kareta Gran Max ida ba eskola Téknika Agríkola Moleana Bobonaro sesta-feira ne’e.
Iha diskursu Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr.Domingos Lopes Lemos hateten, kareta ne'ebé mak Ministériu Edukasaun entrega ba eskola ne'e atu utiliza durante prosesu aprendizajen no prátika iha eskola refere.
"Transporte ne'ebé mak Ministériu Edukasaun entrega ne'e valoriza imi nia servisu di'ak, atu hasa'e kbi'it ne'ebé imi iha tanba ita nia eskola Téknika Vokasionál Agríkola ita hakarak atu prodúz buat ruma, ita nia rai ne'e produtivu. Ho Transporte ne'ebé iha estudante sira bele prodúz modo nune'e servisu hamutuk ho Ministériu Edukasaun hodi fornese ba iha merenda eskolar", dehan Governante ne'e.
Ministériu Edukasaun dadaun ne'e prepara kareta rua fó ba eskola, eskola Agríkola Moleana no Eskola Téknika Natarbora nian, Ministériu Edukasaun tau prioridade Primeiru ba iha Moleana tanba durante prosesu Ensinu aprendizajen hotu iha eskola la'o di'ak prátika mós la'o di'ak. Kareta rua ne'e unidade ida 17 mil.
Fatin hanesan Diretór Eskola Téknika Agríkola Moleana Sr. Afonso dos Santos da Conceição, agradese tebetebes ba Ministériu Edukasaun liuliu Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál ho ekipa bele tau prioridade Primeiru hodi entrega kareta Gran Max ba eskola Téknika Agríkola Moleana atu utiliza durante prosesu prátika iha eskola refere.
"Ami fiar katak Transporte ne'ebé mak Ministériu Edukasaun entrega bele fasilita ami nia prosesu aprendizajen prátika bele la'o di'ak liu tan iha Futuru".
#MédiaME
