Dili – Loron Segunda-feira, 24 Fevereiru 2025
Sua Exelénsia Ministra Edukasaun Dra, Dulce de Jesus Soares, akompaña husi Prezidente INFORDEPE, Sr. Domingos Martins no dirijente sira Ministériu Edukasaun nian halo abertura ba kursu formasaun espesializada iha administrasaun no jestaun eskolár ba dirijente foun husi eskola sira iha Munisípiu Dili. Formasaun ne’e realiza iha INFORDEPE Matadoru, Dili.
Iha entrevista, Sua Exelénsia Ministra Edukasaun Dra, Dulce de Jesus Soares, hateten, ohin formasaun ba administrasaun no jestaun eskolár ba dirijente eskola sira, tanba servisu iha Ministériu Edukasaun ne’e la’os atu hanorin de’it, maibé presiza iha líder hodi jere eskola refere.
“Ema ne’ebé lidera eskola ne’e, presiza iha koñesimentu ba administrasaun no jestaun, atu bele hatene jere no halo inventarizasaun ekipamentu eskola sira, jestaun ba livru sira ne’ebé simu husi Ministériu Edukasaun no mós fahe oráriu ba profesór matéria sira, atu bele hanorin ho di’ak liután”, dehan S.E. Ministra Edukasaun.
Governante ne’e hatutan, depois formasaun ne’e, Ministériu Edukasaun sei kontinua tun ba terrenu hodi halo supervizaun atu buka hatene katak, matéria ne’ebé simu ne’e implementa kalae, karik la implementa dezafiu saida mak halo, tanba iha formasaun ne’e iha mós módul no matériu oioin atu ajuda sira hodi implementa administrasaun no jestaun eskolár ho di’ak liután.
#MédiaME
