RAEOA – Loron Sexta-Feira, 21 Fevereiru 2025
Sua Exelénsia Ministra Edukasaun Dra. Dulce de Jesus Soares hamutuk ho manorin, estudante no inan-aman sira, selebra loron munidál lian-inan ho tema “Edukasaun Multilinge ba Futuru ida ne’ebé Dignu no Sustentável iha Timor-Leste. Serimónia selebrasaun ne’e realiza iha EBC Palaban Oe-Cusse.
Iha entrevista, Sua Exelénsia Ministra Edukasaun Dra. Dulce de Jesus Soares, hateten, implementasaun programa EMULI, antes ne’e implementa de’it iha eskola 4, maibé tinan ida ne’e, Ministériu Edukasaun hamutuk ho RAEOA, expande tán programa EMULI ne’e ba iha eskola hamutuk 42, bazeia pedidu husi eskola ne’e rasik, ne’ebé haree katak programa EMULI ne’e di’ak tebe-tebes hodi ajuda estudante sira liuliu iha Pré-Eskolár no Ensinu Báziku.
“Bainhira sira aprende ho sira-nia lian-inan, sira sei komprende liután buat ne’ebé sira aprende, tanba rezultadu hatudu katak, se labarik ida aprende hahú ho lian-inan, mak nia sei komprende di’ak no lalais liu kona-ba literasia no numerasia”, dehan S.E. Ministra Edukasaun.
Governante ne’e hatutan, programa EMULI ne’e hahú iha tinan 2011, maibé dalabarak ladún implementa ho loloos, maibé tinan ida ne’e no tinan liubá koko atu reforsa hodi nune’e, nia implementasaun ne’e tuir kedas planu no mós tuir metodolojia ensinu ne’ebé mak iha inklui fó mós formasaun no preparasaun ba professor sira kona-ba oinsá halo planu aula antes sira hanorin.
Programa EMULI iha munisípiu sira ne’e, la’os atu hanorin ba etudante hotu kedas, maibé haree ba area remota no extremamente remota, ne’ebé inan-aman ka estudante ne’e rasik la ko’alia lian ofisiál Tetun no Portugues, nune’e, uza progresaun linguístika. Ho objetivu importante mak, sira bele aprende siénsia no lian ofisiál Tetun no Portugues ho di’ak liután.
Serimónia ne’e partisipa husi, Koordenadór Zona Ekonómika Espesiál Dezenvolvimentu Oe-Cusse Ambeno (ZEEDOA), Sr. João Gonçalves, Sekretária Rejionál ba Edukasaun no Asuntu Sosiál (SREAS), Sra. Inácia Tamele no autoridade rejionál RAEOA nian. Hafoin remata diskursu loke mós kompetisaun sertame no prátika plastisina ba estudante sira inklui fahe prémiu ba manan na’in sira husi sertame refere.
#MédiaME
