Dili - Tersa-feira, 11/02/2025
Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, halo abertura ba workshop kona-ba Elaborasaun planu estratéjiku INFORDEPE tinan 2025-2030 Ezekusaun orsamentu ba fundu Infraestrutura 2024 no 2025 nian, iha Salaun Ian Martin INFORDEPE, Dili.
Iha diskursu Sua Exelénsia Sekretáriu Estadu dehan, "hakarak hahú hodi agradese ba ema hotu ne’ebé prezente tanba fó tempu no esforsu hodi kontribui ba evento importante ida-ne’e. Ita-bo'ot nia partisipasaun esensiál ba susesu workshop ida-ne'e nian.
Aleinde ne’e, ha’u hakarak hato’o agradesimentu espesiál ba ita-nia parseiru dezenvolvimentu sira, liuliu Austrália no Nova Zelándia, ne’ebé sira-nia esforsu no kolaborasaun inkansável sai hanesan instrumentu hodi avansa ita-nia sistema edukativu nian. Ita-boot sira-nia dedikasaun no apoiu kontinua folin-bo’ot, no ami agradese tebes ba buat hotu ne’ebé ita-boot sira halo ona no kontinua halo ba edukasaun iha Timor-Leste.
Workshop ida-ne'e reprezenta marku signifikativu ida iha ami nia viajen ba hametin no dezenvolve instituisaun INFORDEPE. Elaborasaun Planu Estratéjiku ba INFORDEPE ba tinan lima oin mai nu’udar prosesu vitál ida ne’ebé sei define diresaun no prioridade ba formasaun profesór sira, hadi’ak kurríkulu no kualidade edukasaun iha rai-laran.
“INFORDEPE nia objetivu prinsipál mak atu investe iha formasaun ba profesór eskola primária no Sekundária sira. Investimentu ida-ne'e esensiál atu asegura katak ami nia edukadór sira preparadu ho di'ak atu hasoru dezafiu sira iha klase laran no fornese edukasaun ida ho kualidade ba ami nia estudante sira”.
Hafoin abertura workshop Sua Exelénsia Sekretáriu Estadu ESJ-ESTV, ho ekipa sira inaugura mós edifísiu foun ba programa HANDS ninian.
Serimónia ne'e partisipa mós husi Prezidente INFORDEPE, Deputado komisaun F Parlamentu Nasionál, Prezidente Interino Komisaun Funsaun Públika, reprezentante Embaixador Australia, Nova-Zelandia no parseiru dezemvolvimentu sira.
#MédiaME
