Ataúro – Loron Tersa-Feira, 10 Fevereiru 2025
Sua Exelénsia Ministra Edukasaun Dra. Dulce de Jesus Soares, akompaña husi Prezidente Autoridade Administrativa Ataúru, Sr. Mateus Belo, no dirijente sira hotu, realiza atividade natal hamutuk ho profesór sira iha territóriu Ataúro laran tomak, hodi ko’alia kona-ba progresu no dezafiu servisu durante tinan 2024 no divulga planu asaun anuál no orsamentu Ministériu Edukasaun nia ba tinan 2025.
Iha diskursu, Sua Exelénsia Ministra Edukasaun Dra. Dulce de Jesus Soares, hateten susesu Ministériu Edukasaun nian iha profesór sira-nia servisu loron-loron, tanba ne’e husu ba profesór sira atu hanorin estudante sira ho didi’ak no tuir planu aula ne’ebé hetan ona liuhusi formasaun.
“Ha’u husu ita hotu atu halo ita-nia responsabilidade ho loloos iha eskola, mak ha’u fiar katak aban-bainrua povu-nia oan ne’ebé ita boot sira hanorin, bele sai jerasaun kontinuadór, responsabilidade, matenek hodi lori nasaun ne’e ba oin, inklui Autoridade Administrativa Ataúro”, dehan S.E. Ministra Edukasaun.
Governante ne’e husu ba profesór sira atu aplika matéria ne’ebé hetan ona liuhusi formasaun ba iha eskola sira liuliu planu aula, katak profesór sira prepara-an hodi hanorin ho loloos, nune’e estudante sira mós bele aprende ho di’ak liután, tanba estudante sira atu sai matenek, depende ba profesór sira-nia maneira hanorin tuir planu aula ne’ebé iha.
Hafoin remata atividade natal hamutuk ne’e, Sua Exelénsia Ministra Edukasaun Dra. Dulce de Jesus Soares, akompaña husi Prezidente Autoridade Administrativa Ataúro, Sr. Mateus Belo, hala’o vizita ba kontrusaun edifísiu eskola CAFE.
#MédiaME
