Ermera, 1 Agostu 2025 – Sua Exelénsia Sekretáriu Estadu Ensinu Sekundáriu Jerál no Tékniku-Vokasionál (ESG-ESTV), Sr. Domingos Lopes Lemos, partisipa iha sesta-feira ne’e iha serimónia tomada de pose ba projetu PNDS – Siklu VI, ne’ebé inklui konstrusaun muru protesaun no seksaun ba estrada Filiál Eskola Bázika (EBF) nia sorin 215 Mau-Ubu, lokaliza iha Postu Administrativu Hatulia B, Munisípiu Ermera.
Durante diskursu, Sekretáriu Estadu hato’o satisfasaun no agradesimentu ba Programa Nasionál Dezenvolvimentu Suco (PNDS) ba konstrusaun moru protesaun ne’ebé formalmente entrega ba Ministériu Edukasaun iha loron hanesan. Nia mós husu ba profesór sira atu kompromete ba manutensaun loloos ba infraestrutura ne'ebé iha.
"Tanba ne'e, ha'u husu mós ba inan-aman sira no tutela sira atu iha papél ativu iha prosesu dezenvolvimentu edukasaun nian no partisipa iha inisiativa sira hanesan ne'e, hodi kontribui ba seguransa no moris di'ak eskola nian", nia subliña.
Konstrusaun ba moru protesaun ne’e hala’o ho orsamentu totál US$48.750, osan ida ne’ebé fó dalan mós ba konstrusaun estrada ida ho naruk metru 115. Investimentu hirak ne’e halo parte iha programa tinan lima Governu Konstitusionál IX nian, ho objetivu atu lori dezenvolvimentu ba komunidade sira ne’ebé izoladu liu no fó benefísiu konkretu ba populasaun lokál sira.
Maski estrada seidauk hatán tomak ba komunidade nia nesesidade, maibé efeitu pozitivu ba setór edukasaun no saúde sente daudaun ona. Governu iha nafatin kompromisu atu kontinua hadi’a infraestrutura iha tempu badak, no Ministériu Edukasaun sei kontinua atu hakbesik eskola sira ba komunidade sira. Atu alkansa objetivu ida ne’e, sidadaun hotu-hotu nia kontribuisaun no kolaborasaun esensiál tebes.
