Bobonaru, 02 Agostu 2025 – Sua Exelénsia Ministra Edukasaun, Dra. Dulce de Jesus Soares, hala’o vizita ba Eskola Ensinu Báziku Filiál Taimea no Ensinu Pré-Eskolar Ai-Aras, iha Postu Administrativu Bobonaru, hodi hola observasaun ba edífisiu eskola no materiál didátiku sira ne’ebé utiliza iha prosesu aprendizajen.
Iha vizita ne’e, Sua Exelénsia Ministra Edukasaun, Dra. Dulce de Jesus Soares, husu ba manorin sira atu kontinua hanorin ho responsabilidade no hakbesik-an liután ba estudante sira, hodi bele koñese di’ak estudante idak-idak nia kapasidade kona-ba matéria ne’ebé sira aprende iha aula-laran.
Governante ne’e mós apela ba manorin no responsavel eskola sira atu halo jestaun ba sala aula ho efisiénte, nune’e estudante sira bele hetan motivasaun no vontade di’ak atu aprende liután.
#MédiaME
