Dili, 19 Maiu 2025 – Estadu Timor-Leste hamutuk ho família no sarani katólika haloot ona Saudozu Pe. Domingos da Silva Soares “MAUBERE” nia isin mate iha fatin deskansa ikus, semitériu Maloa, hafoin remata misa funebre iha Igreja Katedral Dili.

Iha misa funebre, Dom Virgílio Cardeal do Carmo da Silva, hateten, Padre Domingos da Silva Soares, hanesan padre ida ne’ebé mak iha domin bo'ot tebes no iha dedikasaun extraordináriu iha nia vokasaun tomak durante moris tomak.

“Amu Du nia dedikasaun ne’e extraordináriu, nia oferese ba igreja, madre, padre no leigu lubuk ida, Amu Du kria ona fini vokasaun nian iha ita-nia rai no nia sei tau matan nafatin mai ita iha lalehan”, Dehan Cardeal.

Hafoin remata misa, família, sarani katólika, padre no madre sira, hamutuk ho Membru Governu Konstitusionál Da-9 nian, Membru Parlamentu Nasionál, Eis-Titulares, Veteranu sira, kontinua akompaña serimónia transladasaun husi Igreija Katedral ba Semitériu Maloa, hodi ba halo’ot iha fatin deskansa ikus matebian nian.

Saudozu Padre Domingos da Silva Saores “MAUBERE”, Estadu kondekora ho grau órden Nicolao Lobato ho títulu Postumu.

MédiaME