Dili, 19 maiu 2025 – Kandidatu admitidu hamutuk 10,679, partisipa iha teste ba bolsa kandidatu faze datoluk nian, iha área Ensinu Sekundáriu Jerál no Ensinu Sekundáriu Tékniku Vokasionál, hafoin hala’o tiha abertura, iha Salaun Aikurus Binani, Komisaun Funsaun Públika, Matadoru.
Iha diskursu, Sua Excelénsia Prezidente Repúblika, Dr. José Ramos-Horta, apresia ba esforsu ne'ebé hala'o, iha prosesu modernizasaun no reforma iha setór edukasaun hodi fó oportunidade foun ba jerasaun foun sira ne’ebé foin gradua iha nivel lisensiatura husi universidade sira iha Timor laran tomak.
“Ha’u agreadese ba Señora Ministra no Sekretáriu Estadu, ne’ebé ho korajen hodi hahú ona prosesu modernizasaun reforma iha setór edukasaun ne’ebé di’ak tebes, tanba ne’e husu atu reforma ne’e kontinua no lalika ta’uk, tanba reforma radikál mak sei fó oportunidade ba jerasaun foun sira”, dehan S.E. Prezidente Repúblika.
Iha Fatin hanesan, Sua Excelénsia Ministra Edukasaun, Dra. Dulce de Jesus Soares, mós hateten, Ministériu Edukasaun (ME) hamutuk ho Komisaun Funsaun Públika (KFP) hala’o ona prosesu selesaun ba kandidatu sira atu hetan asesu ba pozisaun hanorin iha nivel edukasaun nian. Prosesu selesaun ne’e hala’o ba dala tolu, inklui teste ba nivel Pre-eskolár, Ensinu Báziku no Ensinu Sekundáriu Jerál no Tékniku Vokasionál.
“Ministériu Edukasaun fó sai matriz ba kada matéria iha fulan ida molok hala’o teste, medida ida-ne’e bele ajuda atu hala’o kompetisaun ne’ebé justu no fó asesu igual ba hotu-hotu, no mós atu hadi’a preparasaun kandidatu sira-nian”, dehan S.E. Ministra Edukasaun.
Governante ne’e hatutan, reforma iha setór edukasaun ne’e konsidera hanesan parte importante ba dezenvolvimentu nasaun nian, hodi hasa’e kualidade edukasaun no prepara jerasaun foun ba lideransa futuru iha Timor-Leste.
Kandidatu sira-ne’ebé admitidu tuir teste mak hamutuk ema na’in-10,679. Husi númeru ne’e, feto hamutuk, 5,748 no mane hamutuk, 4,931, entre númeru ne’e hatudu katak, feto sira mak kandidatu barak liu.
Serimónia abertura ba teste bolsa kandidatu faze datoluk ne’e, hetan partisipasaun husi Sua Exelénsia Prezidente Repúblika, Dr. José Ramos-Horta, Sua Exelénsia Ministra Edukasaun, Dra. Dulce de Jesus Soares, Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos, Sua Exelénsia Prezidente Komisaun Parlamentu Nasionál, Sr. Armando dos Santos Lopes, Reprezentante Prezidente Komisaun Funsaun Públika, Dr. José Telo, Komisáriu sira husi Komisaun Funsaun Públika no dirijente sira husi Ministériu Edukasaun.
#MédiaME
