RAEOA – Loron Sábadu, 01 Fevereiru 2025
Sua Exelénsia Ministra Edukasaun, Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos, hamutuk ho estudante no manorin sira Munisípiu Ermera nian, akompaña mahein edukasaun Ilas São João Paulo II hodi entrega ba Rejiaun Administrativa Espesiál Oecusse Ambeno (RAEOA), hafoin remata ninia vizita ba eskola sira hotu iha Munisípiu Ermera.
Hafoin entrega, Sua Exelénsia Ministra Edukasaun Dra. Dulce de Jesus Soares, hateten, Ilas São João Paulo II ne’e sei vizita 108 eskola iha RAEOA hodi hametin liután fiar, karidade, paz, hanesan profesór, estudante no mós inan-aman sira, tanba Ministériu Edukasaun mesak labele, maibé presiza tebe-tebes inan-aman no líder sira-nia apoiu ba oan sira-nia futuru.
“Ilas São João Paulo II sei hela iha RAEOA durente tinan 1 nia laran, tanba ne’e ho prezensa Ilas São João Paulo II nian bele hametin liután ita-nia fiar atu bele sai sarani ne’ebé di’ak, sidadaun di’ak no mós sai estudante ne’ebé mak di’ak ba futuru rai ne’e nian”, dehan S.E. Ministra Edukasaun.
Iha fatin hanesan, Dom Virgílio Cardeal do Carmo da Silva, hateten, mestre no mestra sira hamutuk ho amu pároku sira husi Parókia 5 RAEOA nian atu bele organiza, nune’e Estatua São João Paulo II bele tama sai eskola atu prepara estudante sira bele hetan biban ida ne’e hodi halo peregrinasaun atu bele manan mós tinan grasa ida ne’e nian.
“Vizita Ilas São João Paulo II nian tama sai eskola, hanesan santu ida ne’ebé tama, no hein katak ho tulun mestre no mestra sira nian prepara estudante sira, família sira, edukadór sira, família edukativa atu bele halo mós peregrinasaun ba tinan tomak ida ne’e nian”, dehan Amu Cardeal.
Ilas São João Paulo II sai modelu, nu’udar mestre, edukadór, ezemplu iha dedikasaun ba labarik no foinsa’e sira. Edukasaun la’os de’it mai husi mestre no mestra sira, maibé inan-aman mós iha papél edukadór no labele hanoin de’it buat hotu fó ba mestre no mestra sira, maibé ema idak-idak iha responsabilidade ida ne’e.
#MédiaME
