Dili – Loron Segunda-feira, 03 Fevereiru 2025
Ministériu Edukasaun liuhusi Porta-Voz Sr. Filipe Rodrigues, akompaña husi asesór no dirijente sira, hala’o enkontru ho eis-profesór kontratadu-2023 hodi fó opsaun atu tuir teste espesiál sira liuhusi bolsa kandidatu atu sai manorin iha eskola sira, tuir kuadru pesoál ne’ebé iha. Enkontru ne’e hala’o iha Sala VIP Ministériu Edukasaun, Vila-Verde.
Iha enkontru, Porta-Voz Ministériu Edukasaun, Sr. Filipe Rodrigues, hateten, teste espesiál ne’ebé Ministériu Edukasaun oferese ba eis-profesór kontratadu-2023 ne’e ho razaun katak, entre profesór sira ne’e dedika ona sira-nia-an ba prosesu aprendizajen iha eskola sira, no la taka dalan mós ba eis-preofesór kontratadu-2023 sira atu bele partisipa mós teste jerál ne’ebé mak loke ba públiku.
“Tinan ne’e sei hahú teste ba nivel ensinu sekundáriu jerál no tékniku vokasionál, tanba ne’e ba maluk sira ne’ebé priense rekezitu, bele hola parte iha teste ne’e no sei loke mós teste espesiál ba eis-profesór kontratadu-2023 sira, maibé antes atu hala’o teste, sei fahe mós ‘matrix’ ba públiku inklui ba eis-profesór kontratadu-2023, atu prepara-an ho di’ak antes ba tuir teste refere”, dehan Porta-Voz ME.
Porta-Voz ME ne’e hatutan, iha fulan hirak mai oin ne’e, sei iha vagatura iha eskola sira, tanba profesór sira ne’ebé mak tama ba idade reforma ne’e, kuaze 2 mil resin, tanba ne’e hein de’it Komisaun Funsaun Públika halo remata ona lei liga ho reforma obrigatóriu ne’e, vaga sei barak tebes, hahú husi nivel ensinu pré-eskolár to’o ensinu sekundáriu jerál no tékniku vokasionál, liga tán ho profesór sira ne’ebé mak moras prolongada, ne’e kuaze besik 4 mil.
Iha fatin hanesan, Porta-Voz ba Eis-Profesór Kontratadu-2023, Agostinho Pinto, hateten, Profesór Kontratadu-2023, desidi ona atu partisipa iha teste espesiál bolsa kandidatu atu sai manorin, ne’ebé sei loke husi Ministériu Edukasaun, maibé presiza halo tán diskusaun balun liga-ba kontribuisaun no dedikasaun prefesór kontratadu-2023 nian, ne’ebé durante ne’e sira kontribui tinan naruk ona.
“Ami desidi ona katak, ami sei partisipa teste espesiál bolsa kandidatu ne’e, maibé ita sei iha diskusaun balun liga-ba kontribuisaun no dedikasaun profesór sira nian, tanba sira kontribui ona ba estadu durante tinan naruk nia laran, hafoin sira hetan direitu kontratu iha Governu Konstitusionál da-8 hodi foti sira-nia estatutu voluntáriu ba ajente administrasaun funsaun públika”, dehan Porta-Voz Eis-Profesór Kontratadu-2023.
#MédiaME
