Díli, 02 Outubru 2025
Sua Exelénsia Ministra Edukasaun, Dra. Dulce de Jesus Soares, hamutuk ho doadór Sr. Rudi Kwan, Dr. Avelino Coelho, dirijente sira husi Ministériu Edukasaun, inan-aman no estudante sira, hodi halo lansamentu fatuk dahuluk hodi harii edifísiu foun Eskola Ensinu Báziku Filiál Concin, ne’ebé kompleta ho sala aula tolu no sala ida ba profesór sira, iha Suku Bocolelo, Postu Administrativu Laulara, Munisípiu Aileu.
Iha lansamentu ne’e, Sua Exelénsia Ministra Edukasaun, Dra. Dulce de Jesus Soares, hateten, Sr. Rudi Kwan mak sei ajuda ita halo eskola ida ne’e, bainhira eskola ne’e hotu ona, karik presiza koloka tán profesór mai iha ne’e hodi hanorin estudante sira ne’ebé mak remata kuarta klasse, tanba sira remata tiha kuarta klasse sei la’o ba EBC ne’ebé dook tebes.
“Lori Ministériu Edukasaun nia naran no mós inan-aman, estudante no manorin sira hodi hato’o ami-nia agradesimentu kle’an tebes ba ita-boot sira-nia laran luak hodi bele harii tán sala-aula tolu iha fatin ne’e”, dehan S. E. Ministra Edukasaun.
Governante ne’e hatutan, prosesu konstrusaun ne’e la’o di’ak bainhira inan-aman mós ajuda asegura sasan sira ne’ebé mak tau iha ne’e bele seguru, ema sira ne’ebé servisu iha ne’e mós bele seguru, nune’e servisu ida ne’e bele la’o di’ak no bele hotu lalais, atu oan sira bele utiliza aula ne'e ba prosesu aprendizajen.
Iha fatin hanesan, Sr. Rudi Kwan, hanesan doadór ba konstrusaun edifísiu eskola ne’e hateten, labarik estudante sira ne’e mak nasaun nia futuru hodi kontribui ba nasaun ida ne’e liuhusi harii edifísiu eskola ne’ebé dignu ba labarik sira.
#
#MédiaME
