Lautém, Aelafa 02 Outubru 2025
Eskola Ensinu Báziku Filiál (EBF) Aelafa, ne’ebé filiál husi Ensinu Báziku Sentrál (EBC) No. 1, 2 de Leusari, lokaliza iha Suku Daudere, Postu Administrativu Lautém, Munisípiu Lautém hato'o agradesimentu bo'ot no esperansa foun ba Ministériu Edukasaun.
Komunidade edukativa tomak sente laran ksolok tebes tanba Diretór Nasionál Infraestrutura Edukativa (DNIE), Eng. Helio Lopes, hatán ona preokupasaun sira kona-ba kondisaun eskola ne'ebé grave no la seguru, ho kompromisu katak sei halo konstrusaun foun iha Tinan 2026.
Responde ba lamentasaun krítika ne'e, Ministériu Edukasaun, liuhosi Eng. Helio Lopes, fó garantia katak eskola ne'e sei tau nu'udar prioridade dahuluk atu hetan konstrusaun foun iha Tinan 2026, ne'ebé atu garante katak labarik sira iha Aelafa, Munisípiu Lautém hetan fatin estudu ne'ebé dignu no seguru.
Diretór Eskola EBC Leusari, Mestre Acasiu da Costa, hato'o: "Agradece ba Sua Exelénsia Ministra Edukasaun Dra. Dulce de Jesus Soares tanba orienta ona Eng. Helio Lopes hatan ona preokupasaun husi públiku tomak, liu-liu ba estudante no manorin sira iha Eskola EBF Aelafa.
"Ami hein katak sira bele hahú duni prosesu ne'e tuir tempu, hodi troka edifísiu tuan ne'e ba fatin seguru no inspira labarik sira atu estuda." Tenik Diretór.
Enkuantu hein konstrusaun foun iha 2026, Koordenadora EBF Aelafa, Mestra Rita Pereira, esplika katak eskola ne'e servisu hamutuk ho Komunidade, Autoridade Lokál no Diretor Servisu Edukasaun Munisipál hodi fó ona solusaun sira uza fatin provizoriu kompañia nian hodi hala'o prosesu aprendizajen ba estudante sira.
Nia afirma tan katak eskola ne'e sei muda ba fatin foun ne'ebé Komunidade oferese ona rai ba Ministériu Edukasaun. Mestra Rita Pereira garante katak rai ne'e iha estatutu ne'ebé klaru no iha ona akordu no assinatura deklarasaun ho parte relevante, hodi fasilita prosesu konstrusaun foun ne'ebé planu ona.
Ministériu Edukasaun mós fó sai detallu kona-ba fasilidade ne'ebé sei konstrui hodi sustenta prosesu aprendizajen iha Eskola EBF Aelafa: Sala aula 3 (tolu) foun, dapur merenda eskolár kompleta ho refitóriu, no Fasilidade sanitáriu kompletu.
#JornalistaEmiliodaCruzLopes
#MÉDIA-ME
