Governu Konstitusionál da-9, liuhusi Ministériu Edukasaun, tau prioridade prinsipál ba literasia no numerasia fundasionál iha tinan 2025, tanba estudante sira seidauk iha domíniu kona-ba kompeténsia báziku sira, no sei susar ba sira atu komprende konseitu sira-ne’ebé avansadu no abstratu liu iha klase boot sira. Lia hirak ne’e hato’o, bainhira hala’o enkontru ho manorin sira iha Munisípiu Ermera tomak, kona-ba fahe rezultadu ne’ebé alkansa ona no dezafiu sira ne’ebé infrenta durante tinan 2024, no divulga planu asaun anuál no orsamentu Ministériu Edukasaun ba tinan 2025, iha salaun Parókia Nossa Senhora da Graça, Gleno.
Iha diskursu, Sua Exelénsia Ministra Edukasaun Dra. Dulce de Jesus Soares, hateten, Labarik sira-ne’ebé seidauk hatene lee di’ak to’o klase 3 sei susar liután atu rekupera aprendizajen iha futuru – ida-ne’e loos iha mundu tomak, hodi hatudu ho konsistente katak ita-nia estudante sira seidauk iha domíniu kona-ba kompeténsia báziku sira.
“Atu atinji rezultadu di’ak liu iha 2025 ha’u hanoin di’ak atu uza estratéjia ne’ebé inklui vizita estudu sira ba eskola sira-ne’ebé la’o ho di’ak, no mós aumenta oportunidade formasaun profisionál ba manorin no dirijente eskolár sira, liuliu iha nivel nasionál no internasionál”, dehan S.E. Ministra Edukasaun.
Governante ne’e hatutan, governu iha komitementu atu asegura oportunidade formasaun ne’ebé ekuitativu, no mós halo intervensaun sira hotu ne’ebé asegura katak ita-nia estudante sira aprende. Tanba ne’e, presiza ita hotu tenke rekoñese problema no serbisu hamutuk hodi rezolve.
Alínde ne’e, Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, hateten, Ministériu Edukasaun infrenta problema barak, maibé durante ne’e la ko’alia ba malu, tanba ne’e ohin bolu hamutuk profesór sira hotu iha territóriu Munisípiu Ermera laran tomak hodi mai fahe informasaun ba malu, fó ideia ba malu kona-ba saida mak halo ona no saida mak sei halo tán ba oin.
“Mai hamutuk iha uma-mahon Ministériu Edukasaun nian hodi dezenvolve di’ak liutá edukasaun ba oin. Nu’udar profesór tenki hanorin didi’ak estudante sira , disiplina hodi sai ezemplu ba ita-nia oan sira”, dehan Sekretáriu Estadu ESG no ESTV.
Antes hahú atividade refere, Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, akompaña husi Prezidente Autoridade Munisípiu Ermera no Dirijente Edukasaun Munisípiu Ermera, hodi inagura Estatua São João Paulo II, Mahein Edukasaun, iha resintu Edukasaun Munisípiu Ermera.
#MédiaME
