Manufahi – Loron, Sábado, 25 Janeiru 2025
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hamutuk ho dirijente Ministériu Edukasaun nian no profesór sira hotu husi Ensinu Pré-Eskolár to’o iha Ensinu Sekundáriu Jerál no Ensinu Sekundáriu Tékniku Vokasionál iha Munisípiu Manufahi nian, hodi fahe rezultadu ne’ebé alkansa ona no dezafiu sira ne’ebé infrenta durante tinan 2024, no divulga planu asaun anuál no orsamentu Ministériu Edukasaun ba tinan 2025, iha salaun Parókia Same Munisípiu Manufahi.
Iha dikursu, Sua Exelénsia Ministra Edukasaun Dra. Dulce de Jesus Soares hateten, liuhosi planu tomak ne’ebé aprezenta husi Ministériu Edukasaun, sei sai hanesan baze di’ak liu atu serbisu ho integridade, dedikasaun no inovasaun iha tinan 2025. Analiza hamutuk ho imi kona-ba susesu no dezafiu sira iha 2024, hamutuk hodi rona imi-nia ideia kona-ba rekomendasaun no sujestaun ba futuru sei ajuda ami atu dezeña dalan ba oin ne’ebé inkluzivu no efetivu.
“Profesór sira tenke sente orgullu ba ita-boot sira-nia kareira no profisaun hanesan profesór labele hanoin katak ha’u ne’e profesór de’it, tanba ema hotu bele hamrik iha oin ne’e liuhosi profesór ida, tanba ema barak ko’alia barak maibé ida ne’ebé bele halo mak profesór de’it”, bodik Ministra Edukasaun.
Iha biban hanesan, Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hateten, ohin loron espesiál mai hamutuk iha fatin ida ne'e atu fó hanoin ba malu tuir tema ne'ebé mak hakerek, fahe rezultadu ne’ebé alkansa ona no dezafiu sira ne’ebé infrenta durante tinan 2024, no divulga planu asaun anuál no orsamentu Ministériu Edukasaun ba tinan 2025 nian.
“Enkontru ohin ne'e importante tebe-tebes, nune’e ita atu ko'alia ba malu, habelar ba malu dezafiu saida mak ita infrenta iha tinan 2024 no saida mak ita alkansa tiha ona, husu ba Dirijnte Edukasaun Manufahi atu hamutuk hanoin foun hodi kontinua serbisu hamutuk, Edukasaun atu la'o ba oin presiza ita hotu-hotu nia servisu hamutuk, intervensaun di'ak, hanoin di'ak,” dehan Governante ne'e.
#MédiaME
