Dili, 24-10-2025
Sua Exelénsia Sekretáriu Estadu Ensinu Sekundáriu Jerál no Ensinu Tékniku-Vokasionál, Sr. Domingos Lopes Lemos, akompaña husi Pontu Fokál Edukasaun ba CPLP, Diretór-Jerál no Diretór Nasionál Ensinu Sekundáriu, no mós funsionáriu sira seluk husi Ministériu Edukasaun, ohin hasoru malu ho estudante no profesór sira ne’ebé sei reprezenta iha CPLP Olimpíada Matemátika, ne’ebé sei hala’o iha Ceará, Fortaleza, Brazíl.
Enkontru ne’e ho objetivu atu simu no motiva delegasaun nasionál, hodi destaka kompromisu, dedikasaun, no méritu akadémiku husi estudante sira ne’ebé, hamutuk ho sira-nia profesór sira, prepara atu kompete iha eventu ida ne’ebé prestijiadu liu iha komunidade luzófona.
Iha sorumutu ne’e, Sekretáriu Estadu louva partisipante sira-nia esforsu no kompromisu, subliña katak reprezentasaun ida-ne’e sai fonte orgullu ba nasaun tomak no sinál ba kreximentu kualidade edukasaun iha Timor-Leste. "Sira lori ho sira la'ós de'it sira nia talentu, maibé mós espíritu no determinasaun hosi ema timoroan sira", nia hatete.
Pontu Fokál ba Edukasaun ba CPLP, Sr. Pedro Ribeiro Gonçalves, reforsa importánsia kooperasaun no interkámbiu edukasionál iha mundu luzófonu nia laran, hodi subliña katak esperiénsia ida-ne’e sei fornese ba foin-sa’e timoroan sira esperiénsia aprendizajen foun no perspetiva akadémika.
Iha biban ne’e mos, Ministra Edukasaun, Dra. Dulce de Jesus Soares, hamutuk iha enkontru ne’e, hato’o nia rekoñesimentu no apresiasaun ba estudante no profesór sira, hodi enkoraja sira atu reprezenta nasaun ne’e ho konfiansa no dignidade. Ministru mós kongratula ekipa tomak ba sira-nia kompromisu no dezeja susesu no viajen ne’ebé seguru ba delegasaun timoroan.
Partisipasaun Timor-Leste nian iha Olimpíada Matemátika CPLP nian reflete kompromisu Ministériu Edukasaun nian hodi promove exelénsia akadémika no hametin prezensa nasaun nian iha inisiativa internasionál sira ne’ebé valoriza koñesimentu no talentu foin-sa’e sira-nian.
#MédiaME
