Dili, loron 24 fulan Outubru 2025
Ministériu Edukasaun liuhusi Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, fó sai kalendáriu tentativa ba Profesór Kandidatura Ensinu Sekundáriu Jerál.
Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, hateten Ministériu Edukasaun tarde halo kolokasaun ba Profesór sira, tanba ida ne'e, mak ohin hakarak alerta ba hotu-hotu katak ho rezultadu análize ne'ebé Ministériu Edukasaun liuhusi Diresaun Rekursu Humanu ho ekipa analiza durante ne'e fó ona biban katak iha tempu badak tuir loron ne'ebé determina ona iha-ne'e.
"Iha loron 20-24 fulan Outubru 2025 halo análize nesidade ba Profesór kuadru pesoál Ensinu Sekundáriu Jerál, loron 27- 30 fulan Outubru 2025 Despaixu Ministeriál Xamada Publikasaun iha avizu, loron 03- 07 fulan Novembru 2025 Xamada asinatura Termu aseitasaun, loron 10 Novembru 2025 Posse ofisiál iha Funsaun Públika, fulan Janeiro prepara formasaun husi INFORDEPE".
Governante ne'e dehan, Xamada ba Profesór bolsa kandidatura Ensinu Sekundáriu Jerál no Ensinu Sekundáriu Tékniku Vokasionál sira atu nune'e sira bele kompleta ona sira-nia dokumentu nune'e tempu badak halo kolokasaun no mós fó formasaun ba sira.
"La fasil hanesan bolsa kandidatura sira-seluk, tanba Ensinu Sekundáriu Jerál rasik presiza halo análize ne'ebé klean antes halo kolokasaun, presiza ita hotu-hotu nia pasiénsia, tuir data ne'ebé ami fó sai atu nune’e profesór na'in 700 mak sei tuir xamada ba faze Primeiru nian, tuir análize ne'ebé mak Ministériu Edukasaun iha.
#MédiaME
