Díli, 25 Juñu 2025 – Ministériu Edukasaun hamutuk ho Komisaun G Parlamentu Nasionál (PN) ba Asuntu Edukasaun, Juventude, Kultura no Sidadania. Diskusaun iha faze espesialidade ba Projetu Lei Baze Edukasaun durante loron tolu, hahú husi Kuarta-feira, 25 to’o Sesta-feira, 27 fulan Juñu, iha edifísiu INPA Maubara, Munisípiu Liquiça.
Iha entrevista ho jornalista sira, Sua Exelénsia Ministra Edukasaun, Dra. Dulce de Jesus Soares, hateten diskusaun ne’e importante tebes, tanba Projetu Lei Baze Edukasaun ne’e mai ho objetivu ida, atu atualiza no hadi’a edukasaun Timor-Leste nian. Liuliu kona-ba Edukasaun Pré-eskolar, Ensinu Báziku, Ensinu Sekundáriu, Edukasaun Estra-eskolár no formasaun profisionál.
“Ba artigu sira ne’ebé halo ona diskusaun, la’o di’ak tebetebes no parte rua ne’e hotu, buka atu enrikeze Projetu Lei Baze Edukasaun ida-ne’ebé mak di’ak liu ba futuru edukasaun iha Timor-Leste,” dehan S. E. Ministra Edukasaun.
Governante ne’e hatutan tan katak, Ministériu Edukasaun iha obrigasaun tomak atu marka prezensa durante diskusaun ne’e, no prontu kontribui ba dezenvolvimentu edukasaun iha rai laran, liuhusi Lei Baze Edukasaun ne’e rasik. Governu nafatin ka'er ba Konstituisaun RDTL ne’ebé determina katak edukasaun obrigatóriu, universál no posível gratuita.
Diskusaun ne’e bele fó kontribuisaun importante ba mellora sistema edukasaun, atu garante direitu estudante sira-nian no prepara futuru Timor-Leste ne’ebé di’ak liu.
#jornalistapauladelgado
#MédiaME
