Manatuto, Quarta-feira, 25 juñu 2025
Ministériu Edukasaun liu-husi Diretora Nasionál Ensinu Báziku (DNEB), Sra. Esterlita Soares hamutuk ho Xefe Departamentu DNEB Sra.Teresinha de Jesus Miguel hala’o enkontru ho koordenadór eskola, manorin no inan-aman sira hodi halo preparasaun ba atividade hanesan, dada bee halo to’os eskolár no halo lutu hale’u eskola ligadu ho programa hafurak eskola iha EBF Be’edan, Aldeia Ilimanu, Suku Uma-Kaduak, Postu Administrativu Laclo Munisípiu Manatutu.
Iha Abertura enkontru ne’e, Diretora Nasionál Ensinu Báziku hato’o agradese wain ba inanaman sira ne’ebé mak fó tempu tomak hodi apoiu eskola ida-ne’e, nomós inan-aman sira hahú halo ona serbisu iha eskola refere, ne’e hanesan parte pozitivu ida.
Iha fatin hanesan Koordenadór Eskola Ensinu Báziku Filiál Be’edan, Sr. Fransisco de Carvalho dehan sorumutu ida ohin ko’alia kona-ba oinsá halo programa hafurak eskola.
“Programa hafurak eskola ida-ne’e iha buat tolu mak importante hanesan, dada bee bá eskola, halo to’os eskolár no halo lutu ka pinta eskola”, Dehan Koordenadór Eskola.
Enkuantu iha sorumutu ida-ne’e atu fahe informasaun kona-ba oinsá partisipasaun inanaman nian ba atividade hafurak eskola iha EBF Be’edan.
Atividade refere hetan partisipasaun husi Diretora Nasionál Ensinu Báziku (DNEB) Sra. Estelita Soares hamutuk ho Xefe Departamentu DNEB Sra.Teresinha de Jesus Miguel, Koordenadór EBF no inan-aman sira.
#jornalistaelias
#MédiaME
