Bobonaru, 15 Agustu 2025
Ministeriu Edukasaun liu-husi ekipa Diresaun Nasionál Planu, Orsamentu no Estátistika halao sensibilizasaun kona-ba Violénsia Bazeia ba Jenéru no Saúde Reprodutiva ba estudante sira iha Eskola Ensinu Sekundáriu Jerál Nú 3 iha Postu Administrativu Bobonaru munisípiu Bobonaru.
Iha atividade sensibilizasaun fasilitadór husi Diresaun Nasionál Planu Orsamentu no Estátistika Sr. Nevio Simões hateten, ministériu edukasaun hala’o Sensibilizasaun kona-ba Violénsia Bazeia ba Jenéru no Saúde Reprodutiva iha eskola ensinu sekundáriu jerál no teknika vokasionál ho objetivu atu estudante sira bele koñese no komprende diak liután ba Violensia sira kona-ba Jenéru.
Sosializasaun nee foku ba asuntu sira kona-ba asédiu seksuál no nia definisaun sira hodi nunee sira bele hatene oinsá halo asaun sira hasoru situasaun neebé akontese iha eskola no ita mós partilla informasaun sira kona-ba saúde seksuál atu estudante sira bele kuidadu no hadook an husi moras hadaet seksuál hanesan HIV / AIDS, Tenik Fasilitadór.
Entertantu, Diretor Eskola Ensinu Sekundáriu Jerál Nú 3 Sr. Leonel Barreto hatoo agradese ba ekipa husi ministériu edukasaun neebé ho hanoin diak bele mai sensibiliza informasaun nee ba estudante sira. Espera sensibilizasaun ida-nee bele aumenta diak liután estudante sira nia koñesimentu kona-ba igualdade jenéru no oinsá prevene violénsia hirak nee iha ambiente eskola.
Atividade sensibilizasaun nee halao durante loron tomak, no hetan Partisipasaun husi Diretór da Eskola, Professores no mós Estudante sira.
#JORNALISTAELIAS
#MÉDIAME
