Oe-Cusse, loron 14 fulan Agosto 2025
Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos akompaña husi Diretór Nasionál Ensinu Sekundáriu Sr.Benjamin Fernandes da Cruz, Diretór serbisu Edukasaun Raeoa Sr. Vincencio Cono no Sekretária Rejionál Edukasaun no Asuntu Sosiál Sra. Inácia Tamele hala'o vizita kortejia ba eskola Sekundáriu Téknika Vokasionál Indústria Katólika São João paulo II Pássabe no Eskola Sekundária Jerál klase Paralelo Haobeno Nítibe iha Rejiaun Administrativu espesiál Oe-Cusse Ambeno.
Vizita kortejia ne’e Sua Exelénsia Sekretáriu Estadu ESJ-ESTV Sr. Domingos Lopes dehan, observa eskola ida ne’e di'ak situasaun ida ne'ebé simples maibé eskola refere uza sistema dijitalizasaun ba iha prosesu aula prátika nian no iha tempu ezame.
" Iha Diresaun Sekundáriu Tékniku Vokasionál mos planu ona liuliu eskola sekundáriu Tékniku Vokasionál sira atu uza dijitalizasaun iha eskola idak-idak tinan ida ne’e ita halo ona pilotu", dehan Governante ne'e.
Governante ne’e mós husu ba estudante sira atu estuda makas, estuda ne’e importante tebetebes, labele haree ba konstrusaun eskola importante mak estudante idak-idak nia vontade atu estuda, konstrusaun edifísiu at maibé kakutak la at matéria ne'ebé Profesór sira fó ne’e la to'o estudante mak tenki esforsu-an", dehan Sua Exelénsia Sekretáriu ESJ-ESTV Sr. Domingos Lopes Lemos.
"Eskola Sekundária Jerál Palaban ne’e dok tanba ne'e mak Autoridade Raeoa, servisu Edukasaun Raeoa kordena malu ho inan aman loke klase Paralelo ida iha ne'e. Estudante la la'o dok ona, imi nafatin iha vontade atu estuda makas", hateten Governante ne’e.
Fatin hanesan Diretór Eskola Téknika Vokasionál Indústria Katólika São João paulo II Pássabe Pe. Augusto Hermenegildo Nunes, hato'o agradese ba Sua Exelénsia Sekretáriu Estadu ESJ-ESTV ho ekipa bele halo vizita diretamente ba eskola refere.
"Eskola ne'e loke iha 2020, ensinu aprendijajem ita tuir kurikulum Nasionál Timor-Leste nian, prosesu aprendizajen hanesan babain maibé ita mós implementa sistema estuda iha aplikasaun modelu Informátika nian, tanba ita haree dezenvolvimentu la'o makas, tempu ezame ita uza aplikasaun ofline uza komputadór no bele uza mós telefone android", informa Pe. Augusto
Eskola Sekundáriu Téknika Vokasionál Indústria Katólika São João paulo II Pássabe estudante hamutuk na'in 134, Eskola Sekundária Jerál klase Paralelo Haobeno Nítibe estudante hamutuk na'in 92,
#jornalistarita
#MédiaME
