Díli, 18 Agostu 2025
Ministériu Edukasaun hamutuk ho Organizasaun Mary mackillop Today, lansa inovasaun ba métodu aprendizajen iha pré-eskolar ba labarik no manorin sira atu iha oportunidade transforma maneira aprende no hanorin sira liuhusi dijitál prosesu aprendizajen sira.
Iha serimónia lansamentu ne’e, Sua Exelénsia Ministra Edukasaun, Dra. Dulce de Jesus Soares, hateten, ohin mai lansa aplikasaun ida ho naran Hanorin no Aprende (HAAP), ne’ebé mak dezenvolve husi Organizasaun Mary mackillop Today, ne’ebé lansa ona iha pré-eskola hamutuk 7, pré-eskolar 4 iha Munisípiu Likisa no 3 iha Dili, hodi bele ajuda manorin sira kona-ba prosesu aprendizajen iha aula-laran liuhusi utilizasaun iPad hodi projeta ba parede atu estudante sira bele akompaña.
“Programa ne’e nia konteudu hanesan mós planu aula ne’ebé mak Ministériu Edukasaun estabelese ona ba pré-eskolar no iha prosesu aprendizajen ne’e uza maneira rua hanesan uza livru no mós uza teknolojia dijitál hodi enkoraza estudante sira liuhusi haree figura, kor sira, haree númeru no buat barak ne’ebé mak sei mosu iha aplikasaun ne’e”, dehan S.E. Ministra Edukasaun.
Programa ida ne’e, uza Lian Tetun no iha mós Lian Tokodede no sei dezenvolve tán iha Lian Portugez, tanba ne’e ho prezensa metodolojia foun ba ensinu ne’e, manorin sira bele uza teknolojia ne’e hodi bele hanorin estudante sira atu bele hasa’e kualidade edukasaun iha Timor-Leste.
Aplikasaun ida ne’e la uza rede internet no sei fasilita hodi tau iha inan-aman sira nia telemovel, nune’e inan-aman sira bele ajuda fasilita oan sira iha uma, tanba ne’e husu ba inan-aman no manorin sira-nia seriedade hodi uza aplikasaun ida ne’e ho efetivu.
#jornalistaluisalmeida
#MédiaME
