RAEOA – Loron Domingu, 28 Jullu 2024
Membru Governu Konstitusionál da-9 liuhusi S.E. Ministra Edukasaun Dra. Dulce de Jesus Soares, S.E. Ministra Solidaridade Sosiál Dra. Verónica das Dores, S.E. Ministra Saúde Dra. Elia Reis Amaral, S.E. Vise-Ministra Asuntu ASEAN Dra. Milena Maria da Costa Rangel no S.E. Vise-Ministra Finansas Dra. Felísia Claudinanda Cruz Carvalho, hamutuk ho autoridade sira RAEOA nian hala’o vizita ba komunidade Bi’Eli, Sub-Rejiaun Nitibe hodi fahe ai-han nesesidade bázika família vulnerável sira no haree direta kondisaun moris komunidade nian iha área remota.
Iha vizita ne’e Sua Exelénsia Ministra Solidaridade Sosiál Sra. Verónica das Dores, hateten fatin Bi-Eli ne’e maske foin to’o, maibé hanesan Ministra la haluha komunidade sira iha ne’e hodi kontinua tau matan liuhusi orsamentu estadu ne’ebé kada tinan aprova hodi bele haree ferik no katuas sira inklui estudante sira liuhusi bolsa família nomós ba programa prioridade sira seluk.
“Ami la haluha imi no imi iha ami nia fuan, tanba ne’eatu fó hanoin de’it katak, osan ferik no katuas nian, ne’ebé mak Governu Konstitusionál da-9 hasa’e ne’e, atu sosa netik buat ruma hodi sira han, ami ohin fila, maibé imi iha ami nia fuan” dehan MSSI.
Bairu Bi’Eli uma-kain hamutuk rua nulu resin rua (22) no foin ba dala uluk membru governu ba vizita sira. Antes to’o fatin membru governu na’in 4 ne’e hamutuk ho ekipa la’o ain kuaze kilómetru 6 hafoin to’o fatin.
Remata tiha fahe ai-han ba família vulneravél sira iha bairu Bi’Eli kontinua kedas viajen ba Aldeia Lamase Suku Bene-Ufe Sub-Rejiaun Nitibe hodi kontinua fahe ai-han nesesidade báziku ba komunidade iha aldeia refere.
#MédiaME
