RAEOA – Loron Sexta-Feira, 21 Fevereiru 2025
Sua Exelénsia Ministra Edukasaun Dra. Dulce de Jesus Soares no Sekretária Rejionál ba Edukasaun no Asuntu Sosiál (SREAS), Sra. Inácia Tamele, hamutuk ho dirijente no funsionáriu rejionál RAEOA nian, hodi halo inagurasaun ba Sentru Formasaun Teknolojia Informátika no Komunikasaun (TIK), ho komputadór hamutuk 26, hodi fasilita funsionáriu inklui joven no estudante sira kona-ba utilizasaun teknolojia, iha INFORDEPE RAEOA.
Hafoin inagura, Sua Exelénsia Ministra Edukasaun Dra. Dulce de Jesus Soares, hateten, apresia tebe-tebes, tanba iha fatin sentru formasaun Teknolojia Informátika no Komunikasaun ne’ebé kapás no modern tebes, ho komputadór 26 mak iha sentru formasaun ne’e no sei nakloke ba públiku, maibé sei uza uluk husi funsionáriu sira iha RAEOA hodi uza hasa’e sira nia kapasidade servisu.
“Sentru formasaun ne’e sei loke mós ba professor sira hotu, estudante, joven no ba públiku hotu bele mai uza fasilidade ida ne’e hodi bele ajuda hasa’e sira-nia matenek, liuliu ba professor sira aliened uza halo módulu, bele asesu ba mós ba online, hodi ajuda ita-nia prosesu aprendizajen la’o ho di’ak liután.
Iha fatin hanesan, Sekretária Rejionál ba Edukasaun no Asuntu Sosiál (SREAS), Sra. Inácia Tamele, objetivu husi loke sentru formasaun TIK ne’e atu hasa’e koñesimentu funsionáriu, professor no estudante sira kona-ba oinsá atu uza teknolojia ho di’ak hodi fasilita prosesu aprendizajen ho di’ak liután iha futuru.
“Prioridade ba estudante sira ne’ebé mak la konsege remata sira-nia estudu iha Ensinu Sekundáriu no mós ba sira ne’ebé remata Ensinu Sekundáriu, maibé la iha oportunidade hodi kontinua estuda iha universidade, ami sei bolu sira mai iha ne’e hodi tuir formasaun ne’e, hodi aumenta sira nia koñesimentu, nune’e, ba future sira mós bele kompete iha servisu ruma”, dehan SREAS RAEOA.
Hafoin remata tiha inagurasaun ba Sentru Formasaun TIK, Sua Exelénsia Ministra Edukasaun Dra. Dulce de Jesus Soares kontinua ba vizita Eskola Ensinu Sekundáriu Tékniku Vokasionál Palaban, hodi haree direta estudante sira-nia ekipamentu prátika iha eskola refere.
#MédiaME
