OE-CUSSE, 05 Dezembru 2024
Ministériu Edukasaun liu husi Diretora Jerál Planu Polítika Inkluzaun no Informátika (DG PPII) Sra. Odília das Dores Ung Martins hamutuk ho Xefe Departamentu Diresaun Nasionál Edukasaun Inkluzivu no Asaun Sosiál Eskolár (DNEIASE) sra. Rita Francisca da Cruz Gomes Realiza Semináriu kona-ba Polítika Nasionál Edukasaun Inkluzivu ba Lideransa Eskola Sira, iha Salaun Oe-Upun, RAEOA.
Iha okaziaun ne'e, Diretora Jerál Planu Polítika Inkluzaun no Informátika (DGPII) Dra. Odilia das Dores Ung Martins hateten Agradese teb-tebes ba oe-cusse sai hanesan uma na’in ba iha seminariu ne’e, ho nia importánsia atu bele haklaken informasaun sira relasiona ba Polítika Edukasaun Inklusivu ba ita nia manorin no komunidade sira atu bele hatene oinsa atu fo prioridade ba oan sira ne’ebé ho nesesidade espesial hodi bele asesu ba iha edukasaun.
“Ita hamutuk atu reforsa ita nia oan sira ne’ebé sente katak sira iha kotuk mai ho polítika dehan laiha ema ida ita husik kotuk ne’ebé agora ita la’o, oinsá atu reforsa ita nia oan sira ne’ebé ho difisiénsia atu avansa ba oin” ténik Diretora Jerál ne’e.
Alende ne’e, Sekretária Rejionál ba Asuntu Edukasaun no Solidariedade Sosiál RAEOA Sra. Inácia Tamele hateten, "semináriu ida ne’e importante tebes ba ita hala’o iha Oe-cusse ne’ebé ho objetivu atu halo sosializasaun no advokasia ba lei sira ne’ebé maka Governu Timor-Leste halo ona iha Polítika Nasionál ba Edukasaun Inkluzivu".
Semináriu ne’e marka prezensa husi Xefe Departamentu Diresaun Nasionál Edukasaun Inklusivu no Asaun Sosiál Eskolár (DNEIASE) ho ekipa, Reprezentante PHD no Sentru Nasionál Rehabilitasaun (CNR) nomos Manorin sira.
#MédiaME
#JornalistaReis
