Baucau – Loron Tersa-Feira, 21 Janeiru 2025
Sua Exelénsia Ministra Edukasaun Dra. Dulce de Jesus Soares, hamutuk ho Prezidente Autoridade Munisípiu Baucau, Sra. Veneranda Lemos Martins no Dirijente sira husi Ministériu Edukasaun, hala’o enkontru hamutuk ho manorin sira husi territóriu Lautem nian hodi ko’alia kona-ba rezultadu no dezafiu servisu ba tinan 2024 no divulga planu asaun anuál no orsamentu Ministériu Edukasaun ba tinan 2025.
Iha diskursu, Sua Exelénsia Ministra Edukasaun Dra. Dulce de Jesus Soares, hateten, aprezenta planu tomak ne’e ba tta-boot sira atu bele iha baze di’ak liu hodi serbisu ho integridade, dedikasaun no inovasaun iha tinan 2025. Analiza hamutuk ho imi, susesu no dezafiu sira iha 2024, hamutuk no rona imi-nia ideia kona-ba rekomendasaun no sujestaun, nune’e ba futuru sei ajuda ami atu dezeña dalan ba oin ne’ebé inkluzivu no efetivu.
“Ministériu ida-ne’e la’os haree de’it ba ita-boot sira-nia eskola no situasaun, maibé eskola sira hotu, nivel ensinu sira hotu menus ensinu superiór, no projetu edukativu sira hotu iha nasaun tomak. Nune’e, rekoñese importánsia hosi transparénsia, ekuidade, inkluzividade, responsabilidade no foti desizaun informadu sira, ami sei aprezenta la’os rezumu hosi Planu Asaun Anuál no Orsamentu 2025 nian, maibé planu tomak”, dehan Ministra Edukasaun.
Governante ne’e hatutan, prioridade prinsipál ba Ministériu Edukasaun iha tinan 2025 mak literasia no numerasia fundasionál. Labarik sira-ne’ebé seidauk hatene lee di’ak to’o klase 3 sei susar liután atu rekupera aprendizajen iha futuru, tanba rezultadu hosi teste no ezame sira, maski sa’e ba beibeik, hatudu ho konsistente katak ita-nia estudante sira seidauk iha domíniu kona-ba kompeténsia báziku sira, ne’ebé depois halo susar ba sira atu komprende konseitu sira-ne’ebé avansadu no abstratu liu iha klase boot sira.
#MédiaME
