Lautem – Loron Segunda-Feira, 20 Janeiru 2025
Sua Exelénsia Ministra Edukasaun Dra. Dulce de Jesus Soares, akompaña husi Preizente Autoridade Munisípiu Lautem, Sr. Mélio de Jesus no dirijente sira Ministériu Edukasaun husi nasionál no munisipál hodi hala’o enkontru hamutuk ho manorin sira husi territóriu Lautem nian hodi ko’alia kona-ba rezultadu no dezafiu servisu ba tinan 2024 no divulga planu asaun anuál no orsamentu Ministériu Edukasaun ba tinan 2025.
Iha diskursu, Sua Exelénsia Ministra Edukasaun, Dra. Dulce de Jesus Soares, hateten, ho onra no orgullu hodi hahú tinan foun 2025 ho atividade importante no inkluzivu ida ne’e, natal konjuntu ida ne’e hahú husi semana kotuk to’o ohin loron no sei kontinua to’o remata iha munisípiu sira hotu iha fulan ida ne’e nia laran.
“Eventu sira ne’e sai maneira kapas loos mai ha’u atu hahú tinan foun, tanba fó oportunidade di’ak mai ha’u hodi rona diretamente kona-ba rezultadu no dezafiu servisu ne’ebé ita boot sira infrenta no ha’u sente orgullu kona-ba funsionáriu sira-nia serbisu iha nivel nasionál no munisipál iha 2024, ne’e mak parte ida de’it ne’ebé presiza rekoñese”, dehan Ministra Edukasaun.
Governante ne’e hatutan, eskola sira mak parte importante liu hosi sektór edukasaun. Eskola bele hetan orientasaun, apoiu, no formadu hosi polítika no programa sira iha nivel nasionál no munisipál, maibé tuir loloos eskola ida-idak mak halo desizaun atu uza polítika no programa sira-ne’e atu kria ambiente aprendizajen ida-ne’ebé di’ak liu no efetivu liu ba ninia manorin no estudante sira.
Enkoraja manorin sira atu kestiona, maibé ho neon nakloke, no fiar katak ita hotu iha objetivu ida de’it–ne’ebé mak atu segura katak kualidade edukasaun iha ita-nia rain sei hadi’ak tinan ba tinan, hodi fornese ita-nia rain, ne’ebé ita hotu luta maka’as hodi bele ukun rasik, vantajen sólidu iha ekonomia globál no futuru nabilan ba ema hotu.
#MédiaME
