Ainaro – Loron, Kinta-Feira, 23 Janeiru 2025
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hamutuk ho dirijente Ministériu Edukasaun nian no profesór sira hotu husi Ensinu Pré-Eskolár to’o iha Ensinu Sekundáriu Jerál no Ensinu Sekundáriu Tékniku Vokasionál iha Munisípiu Ainaro nian, hodi fahe rezultadu ne’ebé alkansa ona no dezafiu sira ne’ebé infrenta durante tinan 2024, no divulga planu asaun anuál no orsamentu Ministériu Edukasaun ba tinan 2025, iha salaun parókia Ainaro Munisípiu Ainaro.
Iha dikursu, Sua Exelénsia Ministra Edukasaun Dra. Dulce de Jesus Soares hateten, se mak importante liu iha Ministériu Edukasaun mak profesór sira, tanba profesór sira mak hela loron ba loron, tinan ba tinan hodi eduka estudante sira, hatene estudante sira-nia problema no eskola sira, la’os Governu ka Diretór iha nível nasionál, tanba ne’e ita boot sira mak ema importante atu garante katak susesu Ministériu Edukasaun nian, iha ita-boot sira-nia liman.
“Manorin sira labele sente katak ha’u ne’e profesór de’it, maibe manorin sira tenke sente katak profisaun ida ne’e, profisaun ida ne’ebé dignu, tanba ema barak ko’alia de’it, maibe la halo, so manorin sira de’it mak bele halo, liuhusi eduka estudante sira sai matenek”, Tenik Ministra Edukasaun.
Iha fatin hanesan, Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos informa, ohin hamutuk iha fatin ida ne'e atu fahe hanoin ba malu kona-ba rezultadu ne'ebé Dirijente Ministériu Edukasaun Munisípiu Ainaro halo ona no dezafiu ne'ebé enfrenta durante ne'e, no fó hanoin ba Diretór sira, kargu ne’e responsabilidade ne'ebé Governu fó hodi diriji eskola sira, halo komunikasaun di'ak ho eskola sira, husu mós ba manorin-na’in sira hala'o knaar ho di'ak hanesan manorin-na’in duni, hadomi profisaun nu'udar Profesór, tanba Profesór ne’e Vokasaun.
“Manorin-na’in sira tau matan ba estudante sira labele prátika arte marsiais iha eskola durante prosesu aprendizajen, tanba eskola ne'e iha aluno no Profesór de'it. Mai hamutuk hanoin ida, hakarak ida de'it, iha tinan foun ida ne’e, mai ho hanoin foun, kakutak foun hodi dezenvolve Edukasaun ne’e ba oin tuir Programa nonu governu Konstitusionál nian”. Dehan S.E ESJ ESTV
#MédiaME
